Малкъар Россейге кеси ыразылыгъы бла къошулгъанына 192 жыл толгъанына аталып, Нальчикде Къырал концерт залда байрам концерт болгъанды. Аны республиканы Культура министерствосу  къарачай-малкъар жаш тёлюню айнытыугъа себеплик этген «Эльбрусоид» фондну башламчылыгъы бла къурагъанды.
Залны биринчи къатысында миллет оюула салыннган кийизлени, экинчисинде къатысында уа «Балкария в лицах» деген кёрмючню кёрюрге боллукъ эди.
Байрамгъа кёп адам келгенин, ала залгъа сыйынмагъанларын окъуна белгилерге тийишлиди. Концерт Тёппеланы Алимни «Мени Малкъарым» деген жыры эм «Балкария» къырал этнография ансамбльни тепсеую бла башланнганды.
Ата журтха кертичиликге, туугъан жерге сюймекликге, адамлыкъгъа аталгъан жырланы Жаболаны Замира, Азамат Цавкилов, Жаникаланы Элдар, «Терские казаки», Ауэс Зеушев, Мусукаланы Руслан, Атмурзаланы Элдар, Азамат Евазов, «Амикс» жырчы къауум, Гергъокъаланы Халимат, Текуланы Амур жырлагъандыла. «Кабардинка», «Ассорти», «Шагди», «Нальцук», «АССА-ПАТИ» ансамбльле уа ариу тепсеулери бла байрам ингирге энчи къууат бергендиле. Къулийланы Къайсынны назмусун окъуп «Синяя птица» битеуроссей конкурсну дипломантны Джаппуланы Лейля къууандыргъанды. Концерт «Кабардино-Балкария» деген жыр, къызыу къарсла бла бошалгъанды, анда малкъар, орус, къабарты тилледе да жырла эшитилгенлерин белгилерчады.
Бу датаны юсюнден оюмун «Къайсыннга жюз атлам» фондну башчысы Тетууланы Хадис билдиргенди. «Малкъарны Россейге киргени анга уллу хайыр келтиргенди. Бюгюнлюкде бизни кесибизни атыбыз, миллетибиз барды, жерибизде эркин жашау этебиз. Бусагъатда жарсыуларыбыз, тамамланырыкъ ишлерибиз аз тюйюлдюле. Тамблагъы кюнде «Малкъар Россейге къошулгъанды» деп бегим да чыгъып, тарыхыбызны жазгъанда кетген халатла да тюзетилирле деп ышанама эм миллетими байрамы бла алгъышлайма», - дегенди ол.
Къабарты-Малкъарны бла Къарачай-Черкесни халкъ поэти Созайланы Ахмат а бу ишни болдуруугъа тамата тёлюбюз уллу къыйын салгъанын эсгертгенди. «Халкъыбыз керек кюнде бирлеширге билгенди, ол зат болгъан жерде уа тирлик, игилик, жашау да боладыла. Бу байрамны къурагъанлагъа да ыразлыгъымы билдирирге сюеме», - деп къошханды ол.
Адамладан кёп тилекле келгенлери себепли концерт энтта бир кере къайтарыллыкъды, ол къачан бардырыллыгъы белгили этилликди.