КъМР-ни Башчысы Казбек Коков Къабарты-Малкъарда шёндюгю эпидемиология болумну сюзер ючюн оператив кенгеш бардыргъанды. Анга Роспотребнадзорну КъМР-де Управлениясыны таматасы Жирослан Пагов, КъМР-ни Правительствосуну председателини орунбасары Марат Хубиев, саулукъ сакълау министри Рустам Калибатов,  муниципал къуралыуланы оноучулары къатышхандыла.
Жирослан Пагов регионлада ауругъанланы санына терк къошула баргъанын эсгертгенди. Коронавирус инфекцияны тыйыуну баш амалы халкъгъа дарман салдырыу болгъанын да къайтарып айтханды. Марат Хубиев а промышленный эмда эл мюлк предприятияланы коллективлеринде вакцинация бардырыу жаны бла иш кючленнгенин билдиргенди.
Казбек Коков кенгешге къатышханланы эслерин быллай шартха бургъанды: коллектив иммунитет къуралыр ючюн,бек аздан 270 минг адамгъа дарман салыргъа керекди. КъМР-ни Башчысы муниципалитетлени администрацияларыны таматаларына халкъны арасында ангылатыу ишни кючлендирирге буюргъанды. «Бу магъаналы жумушну тамамлаугъа битеу кючню салыргъа керекди»,-деп чертгенди.