Шахарда табийгъат тийрелеге къарагъан «Горзеленхоз» предприятияны автомашинала паркын жангыртыугъа эмда аны ишин игилендириуге Нальчикни администрациясы бийик магъана береди, деп билдиргендиле муниципалитетни пресс-службасындан.
Бу ишни чеклеринде кёп болмай предприятиягъа беш жангы машина берилгенди. Ала жашиллендириу эмда тазалау жумушлада хайырланыллыкъдыла. Техникагъа тюрлю-тюрлю оборудование тагъаргъа боллукъду: кир-кипчик, топуракъ, терек бутакъла, башха абериле ташыргъа керек болгъаннга кёре тийишлилерин. Орамланы тазалагъанда механикалы сибиртги къошаргъа боллукъду. Жууукъ кезиуде дагъыда тереклеге, юлкюлеге, гюллеге суу салыргъа амал берген орунла да келликдиле.  
Эсигизге сала айтсакъ, былтыр шахарны администрациясы «Горзеленхозгъа» бла «Солуу паркны биригиуюне» он машина сатып алгъан эди.