КъМР-ни Парламентинде «Кавказны келлик заманы» регионла аралы клубну келечилери Москваны халкъла аралы байламлыкъланы къырал институтуну Халкъла аралы тинтиулени институтуну евро-атлантика къоркъуусузлукъну арасыны тамата илму къуллукъчусу, А.Горчаков атлы халкъ дипломатияны фондуну эксперти Сергей Маркедонов бла тюбешиу бардырылгъанды. Сёз Шимал Кавказны шёндюгю Россейде этнополитика эм геополитика магъанасыны юсюнден баргъанды.
Жаш адамла бла тюбешиуге Парламентни спикери Татьяна Егорова да къатышханды. Ол «Кавказны келлик заманы» клуб тири жашланы бла къызланы бирикдиргенин белгилегенди: «Россейни лидерлери» битеуроссей конкурсха къатышханланы, регионлада кадр конкурслада хорлагъанланы. Ол санда аны къауумунда Жаш тёлю палатаны келечилери да болгъанларын чертгенди Татьяна Борисовна.
- Быллай биригиуле артыкъда магъаналы жумушланы тамамларгъа онг бередиле. Жаш адамла танышадыла, бир бирлерини сынауларына юйренедиле. Ол а хар биригизни да билимигизни байыкъландыргъаны бла бирге командада ишлерге юйретеди. Россейни, Кавказны келир кюнюнде ол артыкъда магъаналыды. Сизни фахмугъуз бек алгъа туугъан журтугъузда хайырланыр деп ийнанама,-дегенди ол.
Спикер клубну ишине РФ-ни Президентини Шимал-Кавказ федерал округда толу эркинликли келечисини аппараты себеплик этгенин да белгилегенди. Ол а бу биригиу мындан ары да айнырына, жаш адамлагъа жангы онгла берилликлерине шагъатлыкъ этеди.
Алай лидер ышанлагъа юйренир ючюн а тюрлю-тюрлю сфералада белгили, атлары айтылгъан адамла бла тюбешиуле, ушакъла керекдиле: политикада, илмуда, культурада. «Бюгюннгю тюбешиу да бу ишни чеклеринде бардырылады. Белгили политолог, этнополитика къымылдаула жаны бла алим Сергей Маркедонов бла ушакъ сейир боллугъуна ишексизме. Биз а «Кавказны келлик заманы» клуб бла мындан ары да байламлыкъла жюрютюрге хазырбыз»,-дегенди ол.
Тюбешиуге РФ-ни СКФО-да толу эркинликли келечисини жамауат проектлени жашауда бардырыу жаны бла департаментини эксперти Светлана Самофалова да къатышханды. Ол клубну келечилерини быллай тюбешиуледе экспертлени болушлукълары бла къыралда шёндюгю жамауат-политика болумну ангыларгъа онглары болгъанын айтханды. «Регионда кадр политикагъа, тири, фахмулу, къурау хунерлери болгъан жаш адамлагъа энчи эс бурулады. Полпред Юрий Чайка да бу ишге энчи магъана береди»,-дегенди ол.
Сергей Маркедонов а докладында Кавказны Россейни ич эм тыш политикасында жерини, регионда этнополитика болумну юсюнден айтханды. Дагъыда Россейни жангы тарыхында Кавказда болгъан къаугъаланы сылтауларын да ангылатханды: осетинлилени бла ингушлуланы, Юг Осетияны бла Грузияны эмда Грузияны бла Абхазияны араларында къажаулукъну, Чечен кампанияланы.
Тюбешиу а ушакъ халда баргъанды. Жаш адамланы алимге соруула берирге, аны докладына кёз къарамларын билдирирге онглары болгъанды.
«Кавказны келлик заманы» регионла аралы клуб Россейни президент грантларыны фондуну себеплиги бла къуралгъанын айтырчады. Аны мураты Шимал-Кавказ округда башчылыкъ этиу жаны бла кадрланы хазырлау системасын къураргъады.
Бу ишни чеклеринде регионну республикаларында клубну келечилерини бла экспертлени тюбешиулери къураладыла. Ол санда жылны аллындан бери РФ-ни Президентинде граждан обществону айнытыу эм адамны эркинликлери жаны бла советни башчысы Валерий Фадеев, РФ-ни Жамауат палатасыны секретары Лидия Михеева, политолог – «Петербург политика» фондну оноучусу Михаил Виноградов бла ушакъла бардырылгъандыла.