Аш-азыкъ жаны бла къоркъуусузлукъну жалчытыр, предприниматель болургъа итиниулюкню тирилтир эмда адамланы кеслерине иш къураргъа кёллендирир, халкъны къолайлыгъын игилендирир ючюн, дагъыда бизде чыгъарылгъан товарланы сатаргъа себеплик этер мурат бла быйыл 30 январьда РФ-ни Правительствосуну 208-р номерли бегими чыкъгъанды. Анга кёре, республиканы Промышленность, энергетика эм сатыу-алыу министерствосунда белгилегенлерича, регионланы толтуруучу эмда жер-жерли самоуправление органлары сатыу-алыуну къайсы тюрлюлерине да себеплик этерге, бахчалада эмда терек сабанлада ёсдюрюлген битимлени халкъ аслам жюрюген жерледе сатарча онгла къураргъа керекдиле. Андан сора да, адамланы эмда предпринимательство бла кюрешгенлени рыноклада, ярмаркалада, башха жерледе сатыу этерча жерле бла жалчытыргъа тийишлиди.
Саулай айтханда, Къабарты-Малкъарда бюгюнлюкде онтогъуз ярмарка ишлейди, 550-ден артыкъ сатыу-алыу объект барды. Жылны кезиуюне кёре аланы саны тюрлене туруучуду. Промышленность, энергетика эм сатыу-алыу министерство тийишли инфраструктурагъа эмда быллай норматив актланы жер-жерли самоуправление органла нечик толтургъанларына кёз-къулакъ болгъанлай турады. Бу ишни эсеплери КъМР-ни Правительствосуна эмда федерал министерствогъа жибериледиле.