Кёп болмай Элбрус муниципал районну администрациясыны башчысы Залийханланы Къаншаубий Огъары Бахсанда яслини къурулушу къалай баргъаны бла шагъырейленнгенди. Мекям «Билим бериуню айнытыу» къырал программагъа эм «Демография» миллет проектге кёре ишленеди.
Объектни кёп болмай сюеп башлагъандыла, болсада къысха заманнга иги кесек жумуш этилгенди. Ол санда подряд организация мурдорун салып къабыргъаларын къалай турады. План бла корпус быйылны ахырына битерге керекди.
Эсге сала айтсакъ, эски сабий сад бюгюннгю мардалагъа келишмегени ючюн уллу чырмаула салгъанды эмда къоркъуусуз да болмагъанды.Ол себепден жангы мекямны ачылырын учрежденияны келечилери, сабийле эм элчиле да ашыгъып сакълайдыла.
Спортзалланы шёндюгю излемлеге келишдире
Бу кюнледе «Билим бериу» миллет проектни эм «КъМР-де Билим бериуню айнытыу» къырал программаны чеклеринде Тырныауузну 3-чю номерли орта школуну гитче эм уллу спортзалларына тынгылы ремонт этип башлагъандыла. Аны магъанасы эл жерледе орналгъан мектепледе физкультурадан бла спортдан жараула бардырырча онгла къураргъады.
Кёп болмай объектде Элбрус муниципал районну администрациясыны башчысы Залийханланы Къаншубий да болгъанды. Ол инженер эм техника жаны бла жалчытыу не халда болгъанына эс бургъанды эм тамамланнган жумушла толусунлай мардалагъа келиширлерин, качестволу материалла хайырланырларын да къаты сурагъанды. Ахырында кемчиликлени къысха заманда кетерирлерин эм графикден кеч къалмазча кючлерин аямазларын да излегенди. Спортзал план бла быйыл 15 августдан кеч къалмай битерге керекди.
Жолла жангыртыладыла
КъМР-ни Транспорт эмда жол мюлк министерствосу «Къоркъуусуз эм качестволу автомобиль жолла» миллет проектге кёре «Кёнделен – Кюнбатыш Къанжол – Кёнделен» жолну жангыртып башлагъандыла. Аны чеклеринде Ленин бла Эней улу орамлагъа тынгылы ремонт этилликди.
Аны бла байламлы Элбрус районну администрациясыны башчысы Залийханланы Къаншаубий бла элни таматасы Атмурзаланы Марат объектде болум бла шагъырейленнгендиле. Ишле качестволу эмда графикден кеч къалмай этиледиле. Жангыртыллыкъ участокну узунлугъу жети километрге жетеди. Мында 1-чи, 3-чю эм 4-чю орта школла эм межгит да орналадыла. Ол себепден проект элни тийресин игилендириуге ахшы къошумчулукъ этерикди,- дегенди Залийхан улу.
Ишлени кезиуюнде эски асфальтны кетерип, жангысын саллыкъдыла. Ызы бла жолну кенгертирикдиле, тротуарла ишленирикдиле, темир буруула тартыллыкъдыла, жангы белгиле эм ызла да салынырыкъдыла.
Биринчи сентябрьде сабийле школгъа къоркъуусуз маршрут бла барыр ючюн, бар ишлени да жайны ахырына бошаргъа мурат этиледи. Эсге сала айтсакъ, сагъынылгъан объект заманында битер ючюн, республиканы Башчысы эм правительствосу да аны къаты контрольда тутадыла.