Уллу Хорламгъа аталып бардырылгъан къууанчлы ишлеге Къабарты-Малкъарны автомобиль-жол колледжи да къошулгъанды. «Наследники Победы» деген эришиу къуралгъанды. Аны мураты жаш тёлю туугъан жерибизни тарыхы бла ёхтемленирча, Ата журтубузну маданиятын билирча, ата-бабаларыбызны жигитликлерине баш урурча этиудю, жамауат жашаугъа тири къатышыргъа кёллендириудю.
Эришиулеге Нальчикни 6-чы, 27-чи, 28-чи номерли школларыны бла 4-чю номерли гимназиясындан командала къатышхандыла. Хар къауумгъа 15-18-жыллыкъ 12 адам киргенди. Ала бирге ариу тизилип сюелиуде, аскер амаллагъа жырлап барыуда, автоматны чачып жыйыуда, илишан атыуда, урушха аталгъан жырланы бла назмуланы айтыуда сынашхандыла.
Аланы эришгенлерине уа сыйлы къонакъла - Россейни Сауутланнган кючлерини запасда полковниги Хусейн Мацухов, Нальчикни билим бериу департаментини келечиси Фатима Мукова, шахарны комиссариатыны аскерге чакъырыу эм хазырлау бёлюмюню башчысыны орунбасары Маргарита Саидахмедова къарагъандыла.
Жюрини сайлауу бла биринчи жерге колледжни «Победа» деген командасы чыкъгъанды. 27-чи номерли школну «Тамановцы» къаууму – экинчи, 6-чы номерли школну «Вымпел» къаууму уа ючюнчю болгъандыла. Алагъа сыйлы саугъала берилгендиле, 28-чи номерли школну бла гимназияны командалары уа эришиулеге тири къатышханлары ючюн дипломла бла белгиленнгендиле.