Шёндюгю байрам кюнлени хар жерледеча Майский шахарда да тойоюн халда оздургъандыла. Физкультура-саулукъландырыу комплексни аллында майданда урунууну эмда шахарны кюнлерине атап уллу концерт бардырылгъанды. Коронавирусну хатасындан алгъын жылладача аллай къадар халкъ жокъ эди анда, алай дагъыда жырла бла макъамла узакъгъа эшитилип, адамлада байрам сезимни къураугъа къошумчулукъ этмей къоймагъандыла.
Концертге келгенлени шахарны жер-жерли администрациясыны башчысы Геннадий Милокост эм районну жамауат палатасыны таматасы Светлана Герасимова алгъышлагъандыла. Къонакълагъа деп шахарны орамларында виртуальный экскурсия бардыргъандыла, аланы атларыны магъанасын туура этгендиле. Тогъузунчу майгъа аталгъан орамны юсюнден айтханда, Уллу Ата журт урушха къатышхан, андан къайтмай къалгъан жерлешлерини, жигитлерини юсюнден хапарлагъандыла. СССР-ни Баш Советини Президиумуну 1945 жылда 10 апрельде указы бла, Сергей Михайлович Ушанев, Одер сууну бирси жанына ётюп, анда бийлеген тийреде бардыргъан къызыу сермеш ючюн Совет Союзну Жигити деген бийик атха тийишли болгъанды. Ол Ленинни ордени эм «Алтын жулдуз» майдал бла саугъаланнган эди. Аны аты Майский шахарда орамладан бирине берилгенди, Ленин атлы орамда 23 номерли юйню къабыргъасында уа эсгертиу къанга орнатылгъанды.
«Майчанка» ансамбль, «Максимум» эм «Мей денс -тим» тепсеу коллективле, «Крыныченька», «Счастье», «Буйный Терек» эмда «Радоница» жырчы къауумла концертге келген шахарчыланы кёллерин алгъандыла, деп билдиргендиле районну жер-жерли администрациясындан.