|
|
Мектеплени жылы аш бла жалчытыу не халдады?
29 апреля, 2021 - 07:10
Кёп болмай Черек муниципал районну администрациясыны башчысы Муртазланы Борис билим бериу учрежденияланы таматалары бла кенгеш бардыргъанды. Анда сёз окъуучуланы жылы аш бла жалчытыуну юсюнден баргъанды эмда башха магъаналы соруула да кётюрюлгендиле.
Мектепледе болумну юсюнден билим бериу управленияны таматасыны къуллугъун толтургъан Бёзюланы Ахмат доклад этгенди. Ол айтханнга кёре, муниципалитетни онеки школунда да санитар мардалагъа тийишлиликде жылы аш бла жалчытыу сылтаусуз толтурулады. Ол санда ашханалагъа продукцияны сынамлы поставщикле келтиредиле. Бу жаны бла бир тюрлю чырмау чыкъса, школланы таматалары кеслери мадар этедиле.
Тюбешиуде Бир къырал экзаменнге (ЕГЭ) хазырланыу къалай баргъанына да къаралгъанды. Быйыл районда онбиринчи классны 151 адам бошарыкъды, экзаменлени жорукъларына тюрлениуле кийирилгендиле. Анга кёре энди бийик билим алыргъа излемегенле ЕГЭ-ни бермей, жаланда къырал выпускной экзамен бла чекленип къаллыкъдыла.
Айырмалы окъуучуланы майдалла бла саугъалаугъа да аслам эс бурулгъанды. Озгъан жыллада бир-бир школлада аллайланы саны асыры кёп болгъаны ишеклик туудургъаны да эсгертилгенди. Ол себепден районну башчысы бу жаны бла бир тюрлю хыйлачылыкъ этилмезге кереклисин къаты айтханды.
Андан сора да, атаанала кеслери ыразылыкълары бла мектепни ремонтуна берген ахчаны юсюнден да сёлешгендиле. Быйыл ол формалы ахча жыйыуну тохтатыргъа эм аллай жумушланы жержерли бюджетни кючюне бла спонсорланы къошумчулукъларына тындырыргъа келишгендиле.
Быйыл жылыу бла жалчытыу кезиу бошалса да, тау эллени школларында алыкъа сууукъ болгъаны ючюн аны биразгъа созаргъа деп да оноу этилгенди. Башха жерледе да ол жумуш хауа болумгъа кёре тамамланырча мадар этилликди.
Районда коронавирус жукъгъан ауруу бла байламлы болум да сюзюлгенди. Борис Муртазов жамауатны андан къорууланыр ючюн мындан арысында да тийишли амалланы тири хайырланыргъа буюргъанды эм жыйылгъанланы да вакцинацияны ётерге чакъыргъанды.
Ахырында район башчы сагъынылгъан проблемала бла байламлы эсгертиуле бергенди эм кеси да къолундан келгенича болушургъа хазырлыгъын билдиргенди.
 |
26.04.2024 - 17:10 Солуу кюнде «Экология» миллет проектге кирген «Сейир суу объектлени сакълау» федерал проектге кёре, «Россейни суулары» деген экология акция ётерикди. |
 |
26.04.2024 - 17:09 Халкъыбыз не заманда да тойну-оюнну сюйген миллет болгъанына кёп шартла бардыла. Аны къобузда бла къыл къобузда аламат сокъгъан келечилеринден бири уа Темуккуланы Манаф болгъанды. |
 |
26.04.2024 - 09:03 Эрттенликде уяннганлай, башынгы жастыкъдан айыралмай къалсанг, ангылайса: биягъы къан басым. Жаз башы, жауунла, кюн бирде жай, бирде къыш, къан басымны терк тюрленнгени…Не зат этерге боллукъду? |
 |
26.04.2024 - 09:03 Дондагъы Ростовну «Левенцовский» спорт арасында эстетика гимнастикадан «Оскар» деген облатсь даражалы тёрели эришиу къуралгъанды. |
 |
25.04.2024 - 14:00 Нальчикде дзюдодан Сбербанкны кубогуна регионла аралы эришиу бардырылгъанды. Анга къыралны 7 субъектинден 200-ден аслам спортчу къатышханды. |
|
