Росреестрни Къабарты-Малкъарда Управлениясында бу кюнледе бардырылгъан коллегияда ведомствону былтыргъы ишини эсеплерин чыгъаргъандыла. Жыйылыугъа Управленияны башчысы Виталий Дмитриев, БТИ-ни таматасы Хасанби Шахмурзов, «ФКП Росреестра» къырал учрежденияны таматасы Анна Тонконог эм башхала къатышхандыла, деп билдиргендиле ведомстводан.
Коллегиягъа къатышханла озгъан жылда коронавирус ауруу жайылгъаны ючюн ишде аслам чурум чыкъгъанын белгилегендиле. Къалай-алай болса да, жеринден тепдирилмеген мюлк бла байламлы жумушланы тамамлау борчун Управление тийишлисича тындыргъанды, дегендиле.
Чеклениуле кийирилгенлеринде, майда тийишли жумушланы саны беш мингнге окъуна жетмей къалгъан эди. Июньда уа кёбейип, алты мингнге жуукълашханды. МФЦ-ла да хазна ишлемеген кезиуде Управление гражданлагъа амал этерге кюрешгенди. Аны хайырындан жылны эсеплери да артыкъ осал болмагъандыла. Къырал кадастр эсепге салырча 95 минг чакълы заявление берилгенди. Буруннгу жыл бла тенглешдиргенде, ол жаланда эки процентге азды. Алай учёт-регистрация жумушланы саны уа кёп къалмай сегиз процентге кёбейгенди. Жер участкаладан эсепге юч процентге асламы тюшгенди, жашау журтладан а – тогъуз процентге окъуна.
Ипотеканы юсюнден айтханда, былтыр этилген келишимлени саны ючден бирине кёбейгенди. Коллегияда айтханларына кёре, ол кеси да РФ-ни Правительствосу «Эл ипотека» деген программаны жарашдыргъаны бла байламлыды. Анга кёре гражданла элледе эмда жашагъанланы саны 30 мингден артыкъ болмагъан шахарлада учуз багъасы (0,1-3%) бла кредит алыргъа боллукъдула. Быллай келишимлени регистрациясын къысха заманны ичинде этерча, Росреестр, Ара банк, «ДОМ.РФ» учреждение эмда кредит организацияла байламлыкъда ишлеп башлагъандыла.
Сагъынылгъан чеклениулени хайырындан электрон жумушланы гражданла игирек хайырланып башлагъандыла. Буруннгу жыл битеу берилген жумушланы арасында ол халда тамамланнганла жети проценти алгъан эселе, былтыр аланы ёлчеми 26,5 процентге жетгенди.
Ведомствода экономикада чурумлагъа да эс бурулгъанды. РФ-ни Правительствосуну Председатели Михаил Мишустинни буйругъу бла, жерле не халда болгъанларын тинтип, Росреестр аланы жашау журт къурулушда хайырланыргъа амал табаргъа кюрешгенди. Бизни республикада бу ишге эки жюзден артыкъ гектар бёлюрге боллугъу белгиленнгенди.
Быйылгъы борчланы юсюнден айтханларында, МФЦ-ны ишин игилендириуге, архивлени цифралы халгъа кёчюрюуге мындан арысында да тийишли магъана бериллигин белгилегендиле жыйылыуда.