КъМР-де COVID-19 жукъгъан аурууну профилактикасы эм аны жайылыууна къажау оператив штабдан белгили этгенлерича, республикада коронавирусдан 20 703 адам ауругъанды. Бир кюннге ол 74 адамда ачыкъланнганды.
Пандемияны аллындан бери 19,3 мингден аслам ауругъан сау болгъандыла, тюнене аны 72 адам хорлагъанды. Бюгюнлюкде медицина болушлукъ 972 пациентге бериледи. Пандемияны аллындан бери ауруу 363 инсаныбызны жашауун юзгенди. Ахыр эки кюнде андан бир адам да ауушмагъанын белгилерчады.
Коронавирус КъМР-де жайылып башлагъанлы 441,4 мингден аслам тест бардырылгъанды (бир кюннге – 945 тинтиу). Госпитальлада 441 пациент бардыла, аланы арасында тест коронавирус ауруу жукъгъанын ачыкъламагъанла да. Реанимация бёлюмде 50 саусуз турадыла.
Бюгюнлюкде республикада 9 госпитальдан жаланда 4-сю ишлейдиле. Алада 703 саусузгъа жер барды. Башха госпитальлада ауругъанла сау болуп, юйлерине ашырылгъанлай, мекямлада дезинфекция жумушла бардырылып, ала алгъынча ишлеп башларыкъдыла.
Саулукъ сакълау министерстводан белгили этгенлерича, энди коронавирусха къажау вакцинаны салдырыр ючюн поликлиникада очередьни сакълар кереклиси жокъду. Солуу кюнледе Нальчикде Абхазия майданда иммунизация арала ишлерикдиле. Районлада уа вакцина салдырырча 50 ара ачылгъандыла.
Россейде вирус жукъгъанланы саны иги да азайгъанын белгилерчады. Тюнене ол 11,7 минг адамгъа жукъгъаны ачыкъланнганды. Къыралны битеу субъектлеринде COVID-19 жагъылгъанланы саны 4,2 миллиондан озгъанды. Пандемияны аллындан бери 3,75 миллион адам сау болгъандыла. Вирусну кётюралмай, 84,4 минг адам ауушханды, ол санда тюнене – 383 пациент.