Росгвардиячыла Уллу Ата журт урушну жигитин басдырыу жумушлагъа къатышхандыла, деп билдиргендиле бизге ведомствону пресс-службасындан.
Прохладныйни къабырларында Уллу Ата журт урушда жоюлгъан кичи лейтенант Константин Андреевни басдырыу жумушла болгъандыла. Ол 1944 жылда Эстонияны гитлерчиледен эркин этиу сермешлеге Тарту шахарны тийресинде хауа сермешде жоюлгъанды.
-Уллу Ата журт уруш бошалгъанлы жылла озгъандыла, алай совет халкъ ючюн ёхтемлик, аны жигитлигине хурмет этиу хар бирибизни да жюреклерибизде бюгюннге дери сакъланнгандыла. Хорлам ючюн жанларын-къанларын аямагъанланы атлары ёмюрлюк болгъанды, аланы батырлыкъларына, кишиликлерине багъа берген да къыйынды,-дегенди Прохладныйде ведомстводан тышында къалауурланы бёлюмюню таматасы полицияны полковниги Чочайланы Шахим.
2019 жылда 29 майда Эстонияны Луунья деген жеринде къурулуш ишле бардырылгъан кезиуде ЯК-9Т самолётну къалгъанлары табылгъандыла. Аны ичинде уа Ленинград фронтну 13-чю хауа аскерини 283-чю авиация Выборг полкуну кичи лейтенанты Константин Михайлович Андреевни атына комсомол билет бар эди. Батыр Къабарты-Малкъарда Прохладна районда туугъанды.
13-чю хауа аскерни 1944 жылда 10 октябрьде жоюлгъан аскерчилерини тизмесинде жазылгъаныча, кичи лейтенант Андреевни самолёту 1944 жылда 17 сентябрьде хауа сермешде жокъ этилгенди.
Батырны ёлюгюн тапхан къурулушчула аны юсюнден Санкт-Петербургда излеу отрядха белгили этгендиле. Ала уа жигитни къалгъанларын Къабарты-Малкъарны шахарда келечилигине бергендиле. Алай бла батыр лётчик жоюлгъандан сора 77 жылдан туугъан журтунда басдырылгъанды.
Эсгериу жумушлагъа къатышханда жигитни хурметине бир минут шумсуз тургъандыла эмда къабырына гюлле салгъандыла.