Къабарты-Малкъарны Башчысы Казбек Коков бу кюнледе Терк районда болгъанды эмда Терек шахарда 140 жери болгъан сабий садны ачылыууна къатышханды. Бу жангы социал объектни ачылгъаны бла школгъа дери билим бериуню программасын шёндюгю излемлеге кёре тамамларгъа онг чыгъарыкъды. Аны 7 къауумгъа энчи отоулары, ашханасы, медицина кабинети, музыка эмда спорт заллары бардыла. Ол 2,5 минг квадрат метрни тутады, тийреси да 83, 7 минг квадрат метрден асламды.
Алай бла быйыл тамамларгъа белгиленнген быллай учрежденияладан онусу хайырланыргъа берилгендиле. Ала быладыла: Нальчикде, Майскийде, Бахсанда, Исламейде, Кубада, Хамидиеде яслиле, Терекде бла Нальчикде сабий садла.
Терк районда болгъанында, республиканы оноучусу Маданият юйню да жокълагъанды. Бу мекямда кёп тюрлю байрамла, концертле, кенгешле, тюбешиуле, кёрмючле, конкурсла, фестивальла бардырыладыла. Мында «Терчанка» деген жыр эмда тепсеу ансамбль ишлейди, тёрт клуб, эки тепсеу кружок, бир жыр ансамбль да орналгъандыла.
«Маданият» къырал программаны хайырындан арт жыллада учрежденияны ырысхы-техника онглары да игиленнгендиле. Мекямны башы, терезелери алышындырылгъандыла, видеосистема тартылгъанды, жангы кинооборудование, музыка аппаратура, сахна кийимле алыннгандыла, къараучулагъа да жангы шинтикле салыннгандыла.
Болсада мекямгъа тынгылы ремонт керекди, ырысхы-техника жаны бла да алыкъа кёп зат жетишмейди. Ма ол жумушла тамам этилселе, районда жашагъанланы солуу кезиулерин бютюн тап къураргъа, жумушларын толу жалчытыргъа къолдан келликди.
Казбек Коков «Терек Олимп» спорт комплексде да болгъанды. Терек шахарны жамауаты бу спорт араны бек сюеди. Битеу эришиуле, физкультура-саулукъ сакълау ишле да ма мында къураладыла. Жыл сайын 50-ден аслам район, республикалы эмда битеуроссей даражалы спорт-асламлы ишле бардырыладыла. Фитнесден дерсле да ётедиле.
«Терек-Олимпни» биринчи кесеги 2016 жылда майда хайырланылыргъа берилгенди. Ол «Къабарты-Малкъар Республикада физкультураны бла спортну айнытыу» къырал программагъа кёре ишленнгенди. Алай ахча тауусулуп, бассейни болгъан экинчи блокну къурулушун тохтатыргъа тюшгенди.
Бюгюнлюкде жаланда Терк район къалгъанды жюзюучю бассейни болмай. Проектни тамамлау районну халкъына, ол санда къыяулары болгъанлагъа да, саулукъларын кючлендирирге онг берликди. Казбек Коков муниципалитетни башчыларына бла КъМР-ни Правительствосуна КБР проект-смета документлени хазырларгъа эмда объектни тийишли регион программалагъа къошарча мадарла этерге буюргъанды.
Къабарты-Малкъарны Башчысы Дейское – Тёбен Курп жолну – РСО-Алания бла чекни жангыртыу къалай тамамланнганларына да къарагъанды. Казбек Коков алгъын бу районда болгъанында, аны жамауаты машинала къыстау жюрюген жол элден тышына кёчюрюлсе иги боллугъун айтхан эдиле. Бу жумуш энди «Къоркъуусуз эмда тынгылы жолла» деген миллет проектни хайыры бла болжалындан алгъа тындырылгъанды. Аны бла да къалмай, Акъбаш илипинни юсюнде жангы кёпюр да ишленнгенди.
КъМР-ни оноучусуну ишчи жолоучулугъуну кезиуюнде теркчиле Терек шахарны эмда Плановское элни ичлери бла баргъан жолну да тышына кёчюрюрге кереклисин айтхандыла. Аны бла байламлы КъМР-ни Транспорт эмда жол мюлк министерствосуна тийишли буйрукъла берилгендиле.
