КъМР-ни Башчысы Казбек Коков Правительствону юйюнде коронавирус жукъгъан аурууну профилактикасы эм аны жайылыууна контроль жаны бла оператив штабыны кезиулю жыйылыуун бардыргъанды.
Видеоконференция амал бла республикада санитар-эпидемиология болум сюзюлгенди, COVID-19 жайылгъан кезиуде медицина учрежденияланы ишлери къалай къуралгъаны да тинтилгенди.
КъМР-ни баш санитар врачы Жирослан Паговну айтханына кёре, бюгюнлюкде 713 юйюр ауругъандыла, вирус 1166 адамгъа жукъгъанды. Урунуу коллективледе жагъылгъан кезиуле да бардыла, ала аздыла эмда асламында медицина учреждениялада болгъандыла. Билим бериуню 18 учреждениясында да биришер ауругъан ачыкъланнганды – 9 сабий садда бла 9 школда.
Быйыл 1 октябрьни шартларына кёре, республикада коронавирусдан 7712 адам ауругъанды, аладан 6512 сау болгъандыла, 94 пациент ауушханды. Пандемияны аллындан бери 188 минг тест бардырылгъанды. Госпитальлада медицина болушлукъ 995 адамгъа бериледи, аладан 55-си реанимация бёлюмде турадыла. Саусузланы 27 проценти вирусну шартлары билинмей кётюргендиле, женгил халда 38 проценти ауругъандыла.
Республиканы медицина учрежденияларыны ишлери къалай къуралгъаныны юсюнден саулукъ сакълау министр Рустам Калибатов айтханды. Ол белгили этген шартлагъа кёре, бюгюнлюкде республикада коронавирусдан бакъгъан 6 госпиталь къуралгъанды, ала сау кюнню ишлейдиле. Битеу да бирге алада 1155 саусузгъа жер барды. Ол санда 654-сю кислород, 152-си уа ИВЛ-аппарат бла жалчытылыныпдыла.
Эпидемиология болум осалгъа кетеди деген къоркъуу болса, терк окъуна 1445 жерни ачаргъа онг барды. Аладан 842-сине кислород тартылыпды. Госпитальлада 218 врач ишлейди, саусузлагъа кичи эм орта персоналдан 604 адам къарайдыла.
1032 саусузгъа болушлукъ амбулатория халда бериледи. Аладан 924 инсан аурууну - женгил, 108 саусуз орталыкъ халда кётюредиле, 112 пациент вирусну шартлары билинмей ауруйдула.
КъМР-ни Башчысы бюгюнлюкде республикада, битеу къыралдача, вирус эмда ОРВИ жукъгъанланы саны ёсюп баргъанын чертгенди. Алай боллугъун а Роспотребнадзор бла Саулукъ сакълау министерство алгъадан да эсгертгендиле.
Аны себепли хал контрольдады, республиканы медицина системасы анга хазырды, саусузла учреждениялагъа жетдириу, аланы багъыу тийишли даражада къуралгъандыла. Аны бла бирге экономика бла байламлы чекле кийирирге, башха тыйгъычла салыргъа белгиленмейди.
Билим бериу учрежденияланы юслеринден айта, Казбек Коков алада ауругъанланы саны кёп болмагъанын чертгенди. Аны себепли школланы жабыуну, болжалдан алгъа каникулланы башлауну юслеринден сёз бармайды. Эпидемиология болум бла байламлы хар учрежденияда да тийишли оноула энчи чыгъарылыргъа боллукъдула.
Республиканы оноучусу профилактика мадарланы толтурууну магъаналылыгъын айтыргъа, ангылатыу жумушланы дайым да бардырыргъа, учреждениялада санитар излемле къалай толтурулгъанларын контрольда тутаргъа кереклисин чертгенди.
Эпидемиология хал бла байламлы Роспотребнадзорну КъМР-де Управлениясы кенгешлени, конференцияланы, коллегияланы дистанциялы халда бардырыргъа, къырал власть органлагъа керекли документлени «бир терезеде» амал бла алыргъа, онг болгъанына кёре, бу ишни да дистанциялы халда бардырыргъа кереклиси жаны бла эсгертиулени чыгъаргъанды.
Регионда культура-солуу, спорт жыйылыуланы къурауну юсюнден да баргъанды сёз. Октябрьде гастрономия фестиваль бардырыргъа белгилене эди да, аны къурамазгъа оноу этилгенди.
Жыйылыуну ахырында Казбек Коков жазда коронавирус жукъгъанланы санын власть жамауат бла бирге тамамлагъан мадарланы хайырындан азайтыргъа къолдан келгенин белгилегенди: «Бюгюн да санитар-эпидемиология службаланы жорукъларын толтурургъа, кесигизни, жууукъларыгъызны, абаданланы саулукълары ючюн жууаплылыкъны сезерге керекди. Аны ючюн профилактика мадарланы сакъларыгъызны тилеймсе – медицина маскала жюрютюгюз, къолларыгъызны терк-терк жууугъуз.
Алай бла кюз арты-къыш кезиуге да къоранчсыз, бир тюрлю тыйгъычла кийирмей тюбеяллыкъбыз. Хар не да бизни къолубуздады. Сиз халны ангыларыгъызны тилейме. Власть органла уа медицина болушлукъ толусунлай берилир, инсанларыбызны жашауларын сакълар ючюн битеу мадарланы толтурлукъдула»,-дегенди республиканы Башчысы.
Казбек Коков жер-жерли самоуправление органланы оноучуларына, керек болса, жылытыу кезиуню алгъадан башларгъа чакъыргъанды, бютюнда тау жерледе.
