Беларусьну эм Россейни регионларыны VII форумуну пленар жыйылыуу бардырылгъанды. Ол Уллу Хорламны тарыхы эки къыралны да халкъларыны социал-экономика байламлыкъларыны мурдорун къурагъанына аталгъанды. Аны ишине КъМР-ни Башчысы Казбек Коков да къатышханды.
Жыйылыу Москваны бла Минскни араларында видеоконференция амал бла ётгенди. Форумгъа къатышханланы Россей Федерацияны Президенти Владимир Путин эмда Беларусьну оноучусу Александр Лукашенко да алгъышлагъандыла.
- Россейни бла Беларусьну оноучулары регионланы араларында байламлыкъланы кючлеу, аланы тирилтиу жанлыдыла. Ала Россейни бла Беларусьну араларында керти да къарындаш, къоншу, тенгликни принциплеринде къуралгъан, бир бирлерини сейирлерин сакълагъан байламлыкъланы мурдорудула,-дегенди Россейни Президенти Владимир Путин.
Александр Лукашенко Беларусьну бла Россейни регионларыны форуму кесини магъаналылыгъын кёргюзтгенин белгилегенди. Ол бардырылгъан жылланы ичинде 300 аслам келишим къабыл этилгенди, 2 миллиард сом багъасы контрактлагъа къол салыннганды. Беларусьну оноучусу бу жол да алгъын жетишимле кючленириклерине ышаннганын белгилегенди.
Федерация Советни башчысы Валентина Матвиенко форум эки къыралны да жашаууна терен сингнгенин чертгенди. «Бизни площадкалада халкъларыбызны араларында байламлыкъла тереннге кетгенлери, биз бир бирге керек болгъаныбыз бютюнда сезиледи»,-дегенди.
Ол быллай жыйылыула экономикагъа файдала келтиргенлери бла бирге культура, политика, гуманитар жаны бла магъаналы болгъанларын белгилегенди. «Аланы уа тарихле бла санар онг жокъду. Алай биз аны сезебиз, ангылайбыз. Мен халкъларыбызны араларында ышаныулукъну, бир бирни культураларыбызны байыкъландырыуну, шуёхлукъну юслеринден айтама. Ол а бизни къыралланы араларында байламлыкъланы мурдору кючлю болгъанына шагъатлыкъ этеди»,-деп къошханды ол.
Быйыл форум Уллу Хорламны 75-жыллыгъына аталгъанын эсгертгенди спикер. «Гитлерчилени зорлукъларын биринчи белорус халкъ сынагъанды. Бу къыралны хар ючюнчю инсаны нацизмни ачылыгъын кеси кёргенди»,-дегенди ол.
Республика толусунлай душманны къолуна тюшген эсе да, гитлерчилеге къажау уруш бир кюннге да тохтамагъанды. «Беларусь партизан» деген сёз а патриотлукъну, кишиликни, батырлыкъны белгиси болгъанды. «Биз совет аскерчилени бла офицерлени жигитликлерине баш урабыз – Брест къаланы къоруулагъанлагъа, мамыр адамлагъа да. Ала душманны жесирине тюшгенликге тюнгюлмегендиле, жалынчакъсызлыкълары ючюн къазауатны тохтатмагъандыла, душманны жокъ этгендиле»,-дегенди Федерация Советни башчысы.
Ол бюгюнлюкде да бирле политиканы кючню, санкцияланы мурдорунда къураргъа кюрешгенлерине эс бургъанды. Аны ючюн а тарыхны терс жазгъанлагъа къажау туруу, урушну юсюнден кертини сакълау, аны ёсюп келген тёлюлеге ангылатыу бютюнда магъаналыды.
Бу ишни чеклеринде россейли эм белорус алимле бирге тарых тинтиуле бардырыргъа, китапла жазаргъа, кинола салдырыргъа, ол заманны жигитлерини юслеринден хапарларгъа керекдиле. Спикерни акъылына кёре, Уллу Ата журт урушну кезиуюнде сермешлени юсюнден шартланы цифралы амалгъа кёчюрюу, аланы электрон приложениялагъа, карталагъа къошуу да магъаналы ишледен бириди. «1941-1945 жыллада аскер махтаулукъну жоллары» атлас, «Цифралы жулдуз» проект ол жаны бла иги юлгюдюле. Аланы Беларусьну бла Россейни Парламент Жыйылыуунда Жаш тёлю палата толтурады.
- Быллай проектле андан да кёп болургъа керекдиле. Бу форумда бардырылгъан секцияла, алада чыгъарылгъан эсгертиуле тарыхыбызны сакъларгъа себеплик этериклерине ишексизме. Ала нацизмни башын жулуугъа къажау ишде, жаш тёлюбюзню патриот ниетледе юйретиуде артыкъда кереклидиле»,-дегенди Матвиенко.
Союз къыралланы Парламент жыйылыуларыны семинарыны чеклеринде сабийлени Уллу Ата журт урушну тарыхына юйретиу жаны бла соруу кётюрюлгенин тюзге санагъанды спикер. Ол патриот ниетге юйретиуню баш амалларындан бири боллукъду: «Союз къыралланы тарыхы бир болгъаны миллетлерибизни энчиликлерин сакъларгъа, мындан ары бирге айныуну жолларын белгилерге онг береди».
Пленар жыйылыуда Беларусьну премьер-министри Роман Головченко, РФ-ни Правительствосуну башчысыны орунбасары Алексей Оверчук, Союз къыралны къырал секретары Григорий Рапота, россейли эм белоруслу парламентарийле, правительстволаны келечилери, эки къыралны регионларыны оноучулары да сёлешгендиле.
