К.В. Коков КъМР-ни район администрацияларыны эм шахар округларыны таматалары бла  видеоконференция халда кенгеш бардыргъанды. Аны ишине КъМР-ни премьер-министри Мусукланы А.Т., КъМР-ни Правительствосуну Председателини орунбасары М.А. Кунижев, КъМР-ни къурулуш эм ЖКХ министри А.Х. Бербеков, КъМР-ни транспорт эм жол мюлк министри А.З. Дышеков къатышхандыла. Анда быйыл эм 2024 жылгъа дери жууукъ заманда муниципалитетледе  социал эм жол объектлени къурулушлары, тынгылы ремонтлары бла байламлы соруула сюзюлгендиле.
КъМР-ни Къурулуш эм жашау журт-коммунал мюлк министерствосу билдиргеннге кёре, 2020 жылда  къурулуш объектлеге деп белгиленнген федерал, регион эм муниципал ассигнованияланы  битеулю ёлчеми 1,8 миллиард сомду. Алып айтханда, «Демография» миллет проектни  ызында Шалушка, Къарагъач, Псыхурей элледе, Бахсан шахар округда 4  физкультура-саулукъ кючлеу комплексни эм 29 ясли группа блокну къурулушлары белгиленеди. Бюгюнлюкге  11 школгъа дери блок болжалдан алгъа тамамланнгандыла, къалгъан 18 графикге тийишлиликде жылны ахырына хайырланыугъа берир умутлудула.
Эл тийреледе орналгъан  жашау журтланы  жыйымдыкъ халда тапландырыу жумушланы чеклеринде Огъары Къуркъужин, Урван, Псыншоко, Залукодес элледе, Майский шахарда суу бла жалчытыу беш объект салыннганды, Солдатская станицада эм Тёбен Чегемде  эки суу баргъан ыз ишленип бошала турадыла, Заюковода уа – газ баргъан ыз. Эм уллу объектлени санында Майскийде тазалау сооруженияланы сюеудю.
Нальчик шахар округну «Нарт» микрорайонунда  суу бла жалчытыу эм суу кетиу системаланы къурулушлары  2020 жылда  РФ-ни инсанларын  тапландырылгъан жашау журтла эм коммунал жумушла бла жалчытыу программагъа тийишлиликде бардырылады. Проектге кёре 26 километрден артыкъ суу баргъан ызланы эм 19,2 километр канализация сетьлени салыр муратлыдыла, эки скважинаны къазыу эм насос станцияланы ишлери тындырыллыкъды, сыйындыргъан кючлери 1000м3 болгъан резервуарла тохташдырыллыкъдыла.
Андан сора да, 2015 жылда ремонту башланнган Малкъар театрны реконструкциясын тамамлаугъа  федерал бюджетден 119,5 миллион сом бёлюннгенди.  РФ-ни Маданият министерствосу бла тийишли келишимге къол 7 сентябрьде салыннганды.  Тапландырыу ишлени  эм оборудованияны жетдириу ишлени терклендирирча амалла этиледиле.  Соруу КъМР-ни Правительствосуну контролюндады.
КъМР-ни Транспорт эм жол мюлк министерствосуну кёрюмдюлерине кёре 2020 жылны ахырына  ремонт этилген жолланы битеулю узунлукълары 231 километр чакълы боллукъду, ол санда федерал жолланы 73 километри, регион жолла – 103 километр, жер-жерли магъаналы машина жолла – 54 километр.
«Тапландырылгъан шахар болумланы къурау» регион проектге кёре Къабарты-Малкъарда 34 жамауат кенгликни эм 122 арбаз тийрени  игилендириу планнга салыныпды. Бюгюнлюкге болжалдан алгъа  64 арбазда эм 20 жамауат тийреде ишле ахырына жетгендиле.
Бахсан шахар округда  ара паркны тапландырыу проект жашаугъа кийириледи.  Ол «Гитче шахарла» къауумда 2019 жылда тапландырылгъан шахар болумланы къурау жаны бла эм иги проектлени Битеуроссей эришиуюнде хорлап, 85 миллион сомгъа тийишли болгъанды. Бусагъатда объектни техника хазырлыгъы 94 процентди. Тийрени игилендириу эм жашиллендириу жумушла бардырыладыла.
2020 жылда ол эришиуде «Чегем-Парк» проекти бла Чегем шахар алчы болгъанды. Бюджетле аралы башха трансферт Чегемге 50 миллион сом ёлчемде белгиленеди.
«Муниципал сагъатны» чегинде энчи КъМР-ни Башчысыны  къурулуш эм архитектура, къоратылгъан энергоресурсла ючюн тёлеулени болуму бла байламлы буйрукъларыны толтурулгъанларына къаралгъанды.
Повесткадагъы соруулагъа кёре докладла бла КъМР-ни Правительствосуну Председателини орунбасары М.А. Кунижев, къурулуш эм ЖКХ министр А.Х Бербеков, транспорт эм жол мюлк министр А.З. Дышеков  сёлешгендиле.