Чакъырыу сёзю

Хурметли шуёхла!
Къабарты-Малкъар Республиканы билим бериу системасында ишлегенлени тёреде болгъаныча жангы окъуу жылны аллында бардырылгъан август  кенгешлерине къатышханланы  жюрегимден къызыу алгъышлайма.
Устазлыкъны мурдорун чыгъармачылыкъ тутханына сёз да жокъду. Сизни хунерлигигизге, ишигизге жууаплы кёзден къарагъаныгъызгъа эмда не къадар кёп билгенигизге кёре  къуралады ёсюп келген тёлюню дуниягъа кёз къарамы, адам улу бек багъалыгъа санап келген затланы айыра билгени да. Оюмлу, тири, жамауатха жарагъан, къыралыбызны атын махтау бла айтдыргъан инсанланы ёсдюрюу – ма олду шёндюгю билим бериу системаны баш борчу. Аны бизни устазларыбыз бет жарыкълы толтуралгъанларына бир ишеклигим жокъду.
Заман сизден окъутууну игилендире барыуну, аны ючюн а жангы, бютюн къыйматлы амалла излеуню дайым сурагъанлай турады. Бу кенгешде сиз айтхан оюмла, сизден чыкъгъан башламчылыкъла республикада билим бериуню даражасын андан ары кётюре барыргъа болушурукъларына ышанама. Республиканы власть органлары уа устазланы урунуу эмда жашау болумларына мындан ары да къайгъыргъанлай турлукъдула, къолларындан келгенни аярыкъ тюйюлдюле.
Билим бериуде ишлегенлени барысын да, окъуучуланы бла студентлени, республиканы саулай жамауатын жетип келген байрамла бла – Къабарты-Малкъарны Къыраллыгъыны  эмда Билимни кюнлери бла - жюрегимден къызыу алгъышлайма, саулукъ, насып, монглукъ да тежейме!