Геуюрге кюн Терс-Къолда «Эсде тутууну вахтасы -2019» деген патриот акцияны башланнганына эмда Уллу Ата журт урушну жылларында Элбрусну этеклеринде баргъан сермешледе жоюлгъан 15 къызыл аскерчини сюеклерин сый берип асыраугъа аталгъан митинг болгъанды. Анга КъМР-ни Правительствосуну Председателини орунбасары, Олимпиаданы чемпиону Мурат Карданов, КъМР-ни культура министри  Мухадин Кумахов, республиканы граждан обществону институтлары бла байламлыкъла къурау эмда миллетлени ишлери жаны бла министри Анзор Курашинов, районну администрациясыны башчысы Залийханланы Къаншаубий да къатышхандыла.
Дагъыда Минги тауну тийресинде бу сыйлы ишге РФ-ни Къоруулау министерствосуну, талай жамауат организацияны, излеу отрядланы келечилери, сёзсюз, терскъолчула, школчула, районну эллеринде окъуу юйлени устазлары да къошулгъандыла.
Жашла бла къызла школдан башлап мемориалгъа дери жолну эки жанында къолларында гюллери бла сюелгендиле. Аланы орталары бла, гуллаланы инбашларында кётюрюп, Юг аскер округну аскерчилери ётгендиле. Майданда Уллу Ата журт урушда жоюлгъанлагъа жораланнган назмула, жырла, макъамла да эшитилгендиле.
Мурат Карданов, митингни башлай, КъМР-ни Правительствосуну атындан «Эсде тутууну вахтасын» къурагъанлагъа ыспас этгенди. «Бу огъурлу, аны бла бирге уа къыйын да, жууаплы да ишни къолгъа алгъанла, аны жашауларына къоркъуу тюшгенине да къарамай, бет жарыкълы тындырадыла.
Сиз ёмюрлюк бузланы тюбюнден чыгъарасыз аскерчилени ёлюклерин, архивледе кёп кюнлени эринмей олтурасыз, ёсюп келген тёлюню патриот ниетде юйретиуге да тийишли юлюш къошасыз.
Сизни жюрек халаллыгъыгъыз, таза ниетлигигиз этдиредиле ол жумушну. Сау болугъуз. Ёлгенле жаннетде жатсынла, сауланы борчлары уа хорламны келтириуге уллу багъа берген жигитлени унутмай, алагъа баш ургъанлай турууду,- деп бошагъанды ол сёзюн.
Терс-Къолда мектепни устазы Алчакъланы Раиса атлары белгисиз солдатланы излеу Элбрусда жети жылны ичинде тохтаусуз баргъанын, бу ишге Россей Федерацияны Къоруулау министерствосу уллу себеплик этгенин да айтханды. Ол 2012 жылдан бери Минги тауну тийресинде 109 экспедиция къуралгъанын, 240 солдатны эм офицерни ёлюгю табылгъанын, 52-сини аты тохташдырылгъанын да билдиргенди.
Андан сора да, «Эсде тутууну вахтасы. Эльбрус» деген ат бла 6 жигит-патриот акция бардырылгъанын, «Къоруулау жол» деген ат бла  акцияла да бир ненча кере къуралгъанларын, аланы башламчылары уа Санкт-Петербургдан келген студентле эмда «Мемориал -Эльбрус» болгъанларын да айтханды устаз. Ол Минги тауну тийресинде болгъан къазауатны юсюнден тарых шартла келтирип, назмула да окъугъанды.
Митингде дагъыда Юг Аскер округну битеуаскер армиясыны 49-чу инженер аскерлерини таматасы полковник Роман  Бессмертный сёлешгенди эмда   «Мемориал - Эльбрус» излеу отряд бек магъаналы жумушну тамамлагъанын айтып, анга командованияны атындан ыспас этгенди. РФ-ни  Къоруулау министерствосуну белгисиз аскерчилени атларын тохташдырыу жаны бла управлениясыны бёлюмюню таматасы Игорь Миронов а быллай излеу мадарла Россейни хар къалайында да бардырылгъанларын, РФ-ни Правительствосуну башламчылыгъы бла Россейни Къоруулау министерствосу Интернетде энчи сайт ачханын да билдиргенди. «Анга ким сюйсе да къараргъа, жууукъларын, ахлуларын табаргъа, неда аланы къачан тас болгъанларыны юсюнден билдириу жазаргъа, суратларын жиберирге да боллукъду»,-дегенди.
Ол айтханнга кёре, дагъыда РФ-ни Правительствосуну бегими бла энчи программа жарашдырылгъанды, анга кёре,  аскерчиле асыралгъан жерле, эсгертмеле да тап халгъа келтирилликдиле, анга ахча федерал бюджетден бёлюнюрюкдю. «Биз КъМР-ни Правительствосу, Элбрус районну администрациясы бла да сёлешгенбиз, ала да къолларындан келгенни аямазлыкъларына ышандыргъандыла»,-дегенди Игорь Юрьевич.
Урушну, урунууну эмда Сауутланнган кючлени ветеранларыны республикалы жамауат организациясыны таматасы  Мухамед Шихабахов а, бу акцияны жаш адамланы юйретиуде бютюн уллу  магъанасы болгъанын чертип, республиканы ветеранларыны атларындан аны бардыргъанлагъа жюрек ыразылыгъын билдиргенди.
Сёлешиуле бошалгъандан сора муслийман эмда христиан дин адетле толтурулгъандыла. Ызы бла къызыл аскерчилени сюеклери бла гуллала жерге салыннгандыла. Аланы хурметлерине ушкокладан кёкге юч кере атдырылгъанды, жыйылгъанла уа бир минутну шош сюелгендиле.
Ахырында Минги тауну этегинде немисли фашистлеге къажау сюелген къызыл аскерчилени атлары жазылгъан  366 акъ шар  кёкге жиберилгенди. Терс-Къолну школуну арбазында уа  ол заманда келгенлени аскер как, чай, кофе бла да сыйлагъандыла.
«Эсде тутууну вахтасы» Элбрусда жетинчи кере бардырылады. Ол 21 августда башланып 6 сентябрьде бошаллыкъды. Бу акция 1942-1943 жыллада Элбрусну фашист ууучлаучуладан азатлагъан аскерчилени ёлюклерин излеу эмда Ата журтну къоруулаучуланы, Кавказ ючюн къызыу сермешлени эсде тутуу бла байламлыды.
Бусагъатда вахта Юг аскер округну тау бригадасыны разведротасыны аскерчилерине эмда «Мемориал-Элбрус» излеу отрядны къауумуна кёчгенди. Излеу ишле Терс-Къол эмда Гара-Баши чыранлада бла Буз базаны тийресинде, Тонгуз-Орун ауушда да бардырыллыкъдыла.