Къэбэрдей-Балъкъэрым Мэкъумэш хозяйствэмкIэ и министерствэм иджыблагъэ къызэритамкIэ, 2024 гъэм и щIышылэ -мазаем къриубыдэу республикэм къыщыщIагъэкIа IэфIыкIэхэкIхэм я куэдагъым процент 24-кIэ, нэкулъу ящIым процент 43,7-кIэ, шатащхьэм – процент 1,2-кIэ, кхъуеймрэ кхъуейлъалъэмрэ – проценти 8,9-кIэ хэхъуащ.

ЩIакхъуэмрэ щIакхъуэхэкIымрэ, макарону къыщIагъэкIам и куэдагъыр къапщытэж лъэхъэнэм ирихьэлIэу нэгъабэ щыIа бжыгъэхэм хуокIуэ.

Зэпалъытыж пIалъэм къриубыдэу Къэбэрдей-Балъкъэрым и мэкъумэш, ерыскъыхэкIхэм елэжь IуэхущIапIэхэм зэфIэкIыфIхэр къагъэлъэгъуащ. Псалъэм папщIэ, республикэм сырэу къыщыщIагъэкIам и куэдагъым процент 25-кIэ, псыIэфIхэкIхэм – процент 15-кIэ хагъэхъуащ.

Зэрыщыту къапщтэмэ, КъБР-м ерыскъыпхъэ къыщIэзыгъэкI и  промышленностыр шэщIауэ мэлажьэ, иджыпстуи, къэралым щыщыIэ экономикэ щытыкIэм емылъытауэ, зеужь, ди цIыхухэр фIагъ лъагэ зиIэ шхыныгъуэхэмкIэ ирикъуу къызэрагъэпэщ.

                                     ХЬЭЩЫКЪУЕЙ Олег.