Къыралда миллет саулукълу болур ючюн аслам иш этиледи. Ол санда  жамауат аслам халда  физкультура, спорт бла  да тири кюреширча онгла къураладыла. Жангы спорт мекямла, майданла ишленедиле, аны бла  чекленип къалмай,   жолларына  да къаралады.

Къабарты-Малкъарны юсюнден айтханда, бусагъатда  физкультура эм спорт бла кюрешгенлени  саны 413 мингден атлайды.  Жыл сайын аланы санына дайым  къошула барады.

Арт жыллада регионда 14 уллу спорт объект ишленнгенди. Аны бла бирге эскилени да танг кесеги жангыртылгъанды. Бу жаны бла ишле бусагъатда да тохтамагъандыла.  Аны чеклеринде  «Къоркъуусуз эм тынгылы автомобиль жолла» миллет проектге кёре, алагъа баргъан  жоллагъа да тынгылы ремонт этиледи. Быйыл белгиленнгенича,  30 километр чакълы бирде  беш жол мардалагъа келиширча боллукъдула.    
 Бабугентде къол тюйюшден жараула бардыргъан арагъа  жолну тапландырлыкъдыла. Аны кезиуюнде тротуарла жарашдырыллыкъдыла,   жангыдан асфальт салынырыкъды эм кече чыракъла жаннганча боллукъду. Басхан районда да юч элни ара орамлары жангыртыллыкъдыла. Тёбен Куркужинде, Экинчи Чегемде  саулукъ кючлеу-спорт комплекслеге,  Шордаковода бла   Пролетарскоеде  спорт майданла орналгъан жоллагъа  тынгылы ремонт этилликди. 

Эсге сала айтсакъ, сагъынылгъан миллет проектге кёре, быйыл республикада 100 километр чакълы жолгъа къараллыкъды. Миллет проект    баргъанлы беш жыл чакълы болады, ол кезиуге  жолланы иги кесегин   игилендирирге эм къоркъуусуз этерге онг табылгъанды. 

Бизни корр.