Жазыучу, кесаматчы, филология илмуланы доктору, профессор, КъМР-ни илмусуну сыйлы къуллукъчусу Толгъурланы Хамитни жашы Зейтун туугъанлы 85-жыллыгъына жораланып, КъМКъУ-ну китапханасында  «Малкъар адабиятны тинтиучюсю» деген ат бла уллу кёрмюч къуралгъанды. Анда салыннган экспонатла фахмулу жазыучубузну эмда жашаууну юсюнден толу хапар билдиредиле.  
Толгъур улуну чыгъармачылыгъы малкъар адабиятда энчи жерни алады. Аны «Эрирей», «Кызгъыл кырдыкла», «Ашыкъ оюн», «Жетегейле», «Акъ гыранча», «Алтын аякъ», «Акъ жыйрыкъ» деген эм башха повестьлери бла романлары малкъар адабиятда энчи ызларын къойгъандыла. 
Зейтун Хамитовични адабиятны тинтиу илмуда да юлюшю бир да болмагъанча уллуду. Ол малкъар литератураны тарыхыны юсюнден 300-ден артыкъ статья бла  бир ненча монография  жазгъанды. Ала бусагъатда кёп затха кёз ачадыла эмда  адабият бла байламлы илмуну айнытыугъа уллу къошумчулукъ этедиле.
Холаланы Марзият.