Бу кюнледе Нальчикде 4-чю номерли гимназияда  «Илмуну юсюнден дерсле» деген ат бла фестиваль ётгенди. Аны Къарачай-Черкес Республикадан келген устазла бардыргъандыла. Анга бизни  республикадан  математикадан эмда географиядан окъутхан 40-дан артыкъ устаз къатышханды.

Гимназияны устазлары уа тюрлю-тюрлю  класслада бир темагъа кёре дерсле бардыргъандыла.  Ол а  космосха жораланнганды. Ала  Совет Союзну заманындан бери да окъутууну къыйматлы амалын табыу бла атын айтдыргъан педагог  В.Ф.Шаталовну  сынамын,  проект ишлерин, дагъыда башха амалланы хайырланнгандыла. Анда «Оюмлулукъну оюнлары» деген оюн да бардырылгъанды.

«Тинтиуле жаны бла сынауум»  деген   илму клубну жыйылыуу да болгъанды. Аны кезиуюнде гимназияда окъугъанла Къарачай-Черкесден келген къонакълагъа  кеслерини  медицинада, робототехникада эмда информатикада илму проектлерин кёргюзтгендиле.

Жыйылгъанланы алларында сёлеше,  КъМР-ни Жарыкъландырыу эмда илму министерствосуну   профессионал билим бериу жаны бла  бёлюмюню таматасы Марьяна Абазова быллай ишлени магъаналары уллу болгъанларын  чертип айтханды эмда аланы мындан ары да терк-терк бардыра турургъа кереклисин белгилегенди. «Быллай тюбешиуле регионланы  субъектлерини араларында  илму-методика жаны бла  бирге ишлеуню кючлендирирге себеплик этедиле», -  дегенди ол.

Холаланы Марзият.