Тырныауузда Сабий искусстволаны Абайланы Солтан-Бек атлы школунда Ата журтну къоруулаучуларына аталгъан байрам концерт болгъанды. Ары Сауутланнган кючлени ветеранлары, районну къуллукъчулары, чекчиле, бусагъатда аскерде къуллукъ эте тургъан жашларыбызны аналары, аскер къуллукъгъа энди чакъырылгъан жаш тёлю, колледжни окъуучулары эм жамауат келген эдиле.
Магъаналы байрамны ача туруп, бардырыучула сёзню районну башчысы Сотталаны Къурман Сеитовичге бергендиле:
- Бюгюн Россейни битеу халкъларыны да байрам кюнюдю! Бизни къыралыбызны не заманында да кеслерин аямай, не жууаплы ишден да артха турмай, Ата журтха кертичилей къала билген чынтты жигитлерибизни байрамыды да, мен аллай адамларыбызны жюрегимден алгъышлайма! Мындан ары да дунияда мамырлыкъ, тёгерек-башда шошлукъ да сизни къолугъуздады. Сизге ышаныуубуз чексизди. Биз, сизнича чынтты жигитлери болгъан халкъ, къырал, тамблагъы кюнюбюз, умутубуздача, мамыр болуруна ийнанабыз! Багъалы ата-анала, сизни ариу юйретиуюгюзню хайырындан жашла быллай чынтты жигитле болуп ёсюп, бюгюнлюкде уа къыралларына къуллукъ этедиле! Кишиликни бла батырлыкъны биринчи дерслерин жаланда сиз бералгъаныгъыз ючюн, ыспас этеме! - деп алгъышлагъанды къуллукъда болгъан жашларыбызны бла къуллукъдан къайтхан ветеранланы ол.
Ызы бла сёз Элбрус районну тиширыуларыны советини председатели Моллаланы Заретагъа берилгенди. Ол жыйылгъанланы саулай да советни атындан байрам бла алгъышлагъанды. «Бу аламат байрам бла алгъышлай, артыгъыракъда ыразылыгъыбызны энчи аскер операциягъа къатышып къайтхан жашларыбызгъа бла бусагъатда анда къуллукъ эте тургъанлагъа билдирирге сюебиз. Сиз кишиликни не болгъанын ёсе келген жаш тёлюге кёргюзтгенсиз. Хар этген жигитлигигиз къыралны тарыхында ёмюрлеге жазылып къаллыкъды. Сизни ёсдюрген аналаны алларында баш урама. Сау-саламат жыйылыгъыз туугъан журтугъузгъа, бизни ёхтем жигитлерибиз!» - деп, ыразылыгъын билдиргенди ол да.
Афганистанда, Чеченде, Сирияда бла Украинада бардырылгъан операцияла, башха къаугъала да ёмюрледе жюрекледен кетмезлик ыз къоядыла. Бу урушлада жашауларын аямагъан жашларыбыз Татталаны Заур, Бачиланы Алим, Балаланы Мурат, Тебердиланы Рамазан бла Денис Гапизов къыралларына берген антларына кертичилей къалып, Кишиликни ордени бла ёлгенден сора саугъаланнгандыла. Аны юсюнден да айтхандыла ол кюн.
Концертни кезиуюнде энчи аскер операциягъа къатышып, жаралы болуп госпитальда тургъан жерлешибиз, культурабызны аламат жулдузу Докаланы Юсюпге, ол сермешлени кезиулеринде кёргюзтген батырлыгъы ючюн Жуков атлы майдалгъа тийишли болгъанын билдире, устазы эм шуёху Батырбийланы Махти жыр саугъалагъанды.
Патриот жырла, ариу тепсеуле бла да Элбрус районну маданиятыны ишчилери къууандыргъандыла, «Салам», «Арабеск» ансамбльле уа аламат тепсеулерин саугъалагъандыла. Чынтты эр кишилеге – Ата журтну къоруулагъанлагъа –жораланнган ариу ингир «Байракъ» деген патриот жыр бла бошалгъанды.
Темуккуланы Асият.
Суратла авторнудула
