Бу кюнледе Черек районну 1-чи  номерли спорт школуну келечилери Нальчикде бардырылгъан бир къауум эришиуге къатышхандыла. Аладан бири  Кенжени Маданият юйюнде  ётгенди. Анда боксдан 2010-2011 жыллада туугъанланы араларында регион  биринчиликде  Огъары Малкъар, Бабугент, Бызынгы, Къашхатау эллени жаш спортчулары ахшы кёрюмдюле болдургъандыла. 
Кеси ауурлукъларында Ахкёбекланы Илияс (40 кг.), Улбашланы Артур (60 кг.) хорлап, «алтынла» къытхандыла. Кюмюш майдалланы  уа Чеченланы Осман (40 кг.), Холаланы Аслан (48 кг.) алгъандыла. 
Жашла тренерле Герийланы Хусейинде, Чочайланы Расулда, Чеченланы Арсенде эм Сараккуланы Ринатда жарау этедиле.  
Дагъыда бу школну келечилери тутушууну бир тюрлюсюнден  Нальчикде бардырылгъан турнирде кеслерин кёргюзтгендиле. Ол эришиуге Чеченден, Ингушетиядан, Къарачай-Черкесден, Шимал Осетия-Аланиядан, Къазахстандан, Узбекистандан эм Таджикистандан  битеу да 170 жаш спортчу къатышханды.
Мында бизни жашладан жетеулен  кеси жыл санлыланы  араларында юч «алтын» эм тёрт да «кюмюш» къытхандыла. Къазийланы Рамазан, Шхагапсоев Беслан эм Батчаланы Ибрагим да биринчи жерге  чыкъгъандыла. Къадырланы Алан, Тогъузаланы Кемал, Тюменланы Кемран эм Герузланы Зариф а кюмюш майдалла бла къайтхандыла. 
   Спортчуланы Османланы Мухтар бла Къарчаланы Альберт юйретедиле.

Къасымланы Аминат.