«Единая Россия» политика партияны башчысы Дмитрий Медведевни регионда приёмныйинде Къырал Думаны депутаты Адальби Шхагошев приём бардыргъанды. Анга жарсыулары бла онбир адам келгендиле, ол аланы барысына да тынгылагъанды, себеплик этерге айтханды.
Бек алгъа Адальби Шхагошев сакъатлы бла тюберге сюйгенди. Анга да къарамай, жаш эки жерде окъуйду, бийик билим алады, чыгъармачылыкъгъа да хунери барды. Ол кёп операцияны кётюргенди, алай энтта да больницагъа жатаргъа керекди, аны ючюн болушлукъ излейди. Адальби Люлевич анга тирилиги, чыдамлылыгъы, итиниулюгю ючюн уллу ыспас эте, байламлыкъ жюрютюрюгюн, къолдан келгенни аямазлыгъын айтханды.
Май райондан фермер В.Х. жер ючюн аренда тёлеу асыры уллудан, ишин андан ары бардырыргъа онгу болмагъанына, алай властьладан себеплик тапмагъанына тарыкъгъанды. Нальчикден пенсиячы Н.Х. уа дача участканы алалмагъанын билдиргенди. «Юйюрюбюз аны 1996 жылдан бери сакълайды. Мен урунууну ветераныма, саугъаларым да бардыла. Алай алагъа магъана берилмегенча кёрюнеди. Участкасыз тургъаныбыз а законодательствода болгъан тюрлениуле ючюндю», - дегенди ол. Кертиси бла да, инсан жашагъан жерин алышындырса, тизмеден чыгъарылады. Депутат бу болумгъа энчи къараргъа айтханды.
- Чыгъарылгъан законла субъектледе къалай толтурулгъанларын эсепде тутуу, аланы ахшы эм осал жерлерин ачыкълау депутатлагъа бек магъаналыды. Аны ючюн а адамла бла тюбеширге керекди.
Къырал Думада социал жумушланы тамамлаугъа уллу эс бурулады. Жашау журтла бла жалчытыу, саулукъ сакълау, билим бериу бла байламлы кемчиликлеге энчи магъана бериледи. Сёз ючюн, биринчи медицина болушлукъ этген машинагъа жолда жер бермегенлери бек жарсытады, аны хатасындан врачла саусузгъа заманында жеталмай къаладыла, ол а ёлюмлеге окъуна келтиреди.
Бу жаны бла хал къалай болгъанын билир муратда кесим да жолгъа чыкъгъан эдим - болум къууандырырча тюйюлдю. Талай жылны кюреше, медицина болушлукъ этген машиналагъа жол бермегенлени жууапха тартыуну къатыландырырча этгенбиз, саусуз ёлген эсе уа, терслиги болгъанны энди уголовный жууапха да тартырыкъдыла, - деп билдиргенди Адальби Шхагошев.
Жамауат бла тюбешиуледен сора кёп кемчиликлени юслеринден билесе, сора аны тамамлау жаны бла ишлеп башлайса. Сёз ючюн, терроризмге къажау кюреш, аманлыкъчыла адамланы алдап кеслерини араларына къошмазча амалла табыуну юсюнден закон жарашдырыргъа деген башламчылыкъны быллай приёмладан сора этген эдим. Кюзде жангы проектни къараугъа берликме, ол лабораториялада чачдырыучу устройстволаны (СВО) хазырлаугъа чек салыу бла байламлыды. Нек дегенде аманлыкъчыла, аланы хайырланып, кёп адамны ёлтюргендиле. Мен оюм этгенден, бюгюнлюкде аны ючюн жууаплылыкъ артыкъ уллу тюйюлдю. Баш сюдде, партияда да бу башламчылыгъым къабыл кёрюлгенди. Хар къуллукъчу адамла ючюн, аланы жашауларын игилендирир ючюн ишлегенин унутмазгъа керекди, дегенди Адальби Люлевич.