Къабарты-Малкъар къырал аграр университетни быйыл бошагъан минг жаш адамдан 173-сю айырмалы белгилеге окъуп, «къызыл» дипломла къоллу болгъандыла. Орта кюн а аланы къууанчлы халда бергендиле. Жаш адамланы бу артыкъда магъаналы кюнлери бла алгъышларгъа КъМР-ни Башчысыны къуллугъун болжаллы халда толтургъан Казбек Коков, федерал инспектор Евгений Ткачёв, толтуруучу власть органланы келечилери да келгендиле.
Казбек Валерьевич, Къабарты-Малкъарны айныуу билимли, фахмулу кадрланы къолларында болгъанын чертип: «Окъугъан кезиуде битеу кючюгюзню, фахмугъузну салып, къадалып кюрешип, айырмалы дипломлагъа тийишли болгъансыз. Мындан ары да жангы жетишимле тежейме»,-дегенди.
Республиканы оноучусу кеси да бу вузну тауусханын айтып, мында билимли, ишлерин уста билген устазла, профессорла ишлегенлерин чертгенди. «Студент жылла – аламат кезиудю, бютюнда быллай адамла окъутхан жерде. Мындан ары уа билимигизге кёре ишге тохташып, республиканы экономикасын айнытыугъа къошумчулукъ этеригигизге ишексизме»,-дегенди ол.
Евгений Ткачёв а, бу кюн жаш адамланы жашауларында артыкъда магъаналы болгъанын белгилеп, аланы жюреклеринде сезимни ангылагъанын айтханды. КБГАУ-ну ректору Аслан Апажев бек алгъа жаш адамланы ата-аналарына ыразылыгъын айтханды, устазлагъа билимлерин аямай, ёсюп келген тёлюню юйретиуге салгъан къыйынлары ючюн ыспас этгенди.
- Бу кюн барыгъызны да эсигизде кёп жыллагъа къалыр деп ышанама. Казбек Коков да бизни вузда окъугъанды, сиз  да, аныча, уллу жетишимле болдуруп, республиканы, къыралны алгъа барыуун жалчытырсыз деп ийнанама, -дегенди ол.
Ызы бла айырмалы выпускниклеге дипломлары берилгендиле. Вузда 22 усталыкъгъа юйретедиле. Белгиленнгенлени арасында уа бизни жашларыбыз бла къызларыбыз кёп болгъанлары бютюнда ёхтемлендиреди. Аланы барысыны да атларын санап чыгъар онг жокъду, алай, юлгюге, жаланда ветеринария эм биотехнология факультетни «къызыл» дипломгъа бошагъанланы арасында Калабекладан Радима эмда Ибрагим, Къазакъланы Залина, Ботталаны Эльдар, Толгъурланы Зулейха, Аппайланы Альфия, Жаболаны Жамиля, Жансуйланы Альбина, Мамайланы Азинат, Моллаланы Лалина эм башхала бар эдиле.
Студентлени байрамларына уа белгили артистле Султан Хажироков, Рустам Абаноков да келип, жаш адамлагъа жырларын саугъалагъандыла.