Къабарты-Маклкъарны Башчысы Юрий Коков бу кюнледе Шимал Осетия-Аланияда болгъанды эмда къоншу республиканы оноучусу Вячеслав Битаров бла эки регионну араларында  байламлыкъланы андан ары кючлендире барыуну амалларын сюзгенди.
КъМР-ни таматасы бек алгъа «Мёлеклени шахары» мемориал комплексге барып, «Бушуулу терекге» эмда 2004 жылда сентябрьде Беслан шахарны 1-чи номерли школунда  жесирлени эркин эте туруп жоюлгъан полициячыланы эсгертмелерине гюлле салгъанды. Бандитлени чабыууллукъларыны хатасындан ол заманда 334 адам, ол санда 186 сабий ёлгендиле.
Ол кюн окъуна Владикавказда эки жанлы тюбешиу болгъанды. Анда сёз асламысында сатыу-алыу, гуманитар, маданият, билим бериу жаны бла  байламлыкъланы кючлендире барыуну, инвестиция проектлени бирге толтурууну, предпринимательлени бирге ишлеулерин къурауну юсюнден баргъанды.
Юрий Коков арада халланы  ёзегин  не заманда да Шимал Осетия-Алания Республиканы бла Къабарты-Малкъарны халкъларыны тёрели къарындаш байламлыкъла тутханларын чертип айтханды. Ол Правительствону юйюню къатында Махтаулукъну къабыргъасына да эс бургъанды. Анда Шимал Осетияны айтхылы жашларыны бла къызларыны – Совет Союзну, Социалист Урунууну Жигитлерини, Махтаулукъну орденини толу кавалерлерини, Россейни Жигитлерини эмда Россейни Урунуу Жигитлерини – атлары жазылыпдыла.
Журналистлени сорууларына жууаплай, Юрий Коков былай чертгенди: «Биз бош къоншула болуп къалмай, дагъыда кёп зат бла байламлыбыз. Республикабызны битеулю регион продуктуну структурасын алсакъ, ала келише келедиле: эл мюлк, промышленность, сатыу-алыу, туризм. Уллу хайыр берлик проектле да бардыла. Бизни баш муратларыбыздан бири – жангы ишчи жерле къурауду. Ол а регионларыбызгъа бек магъаналыды».
«Биз эки къоншу къарындаш халкъны, жер къуралыуу, тырыхы да бирге ушагъан эки регионну келечилерибиз,-дегенди Вячеслав Битаров. – Бир бирибизни жетишимлерине къууанабыз, ахшы сынаугъа да бир бирден юйренебиз. Республикаларыбызны бюгюннгю борчлары да бирчаладыла. Аны себепли арабызда байламлыкъла, сынауубуздан юлюш этиу кючлене барыргъа керекди».
Тюбешиуде социал эмда экономика жаны бла бирге ишлеуню кенгертиу жаны бла ишчи къауум къураргъа келишим этилгенди. 2019 жылдан башлап Шимал Осетияда Къабарты-Малкъар Республиканы маданият кюнлери, КъМР-де уа – осетин культураны кюнлери бардырыллыкъдыа.
КъМР-ни бла РСО-Аланияны башчылары Гуманитар эмда социал тинтиулени В.И.Абаев атлы институтунда, Миллет музейде да болгъандыла.
Эки регионну да оноучуларыны бу биринчи тюбешиулери тюйюлдю. 2017 жылда Вячеслав Битаров Къабарты-Малкъаргъа иш бла келип кетгенди.