Иорданияны посолу ыразылыгъын жашырмагъанды.

Бу кюнледе Къабарты-Малкъаргъа келиуюню чеклеринде Иорданияны Хашимит Королевствосуну Россейде посолу Амджан Обу Адалье консул эмда КъМР-ни Правительствосуну, республиканы Башчысыны администрациясыны келечилери бла бирге КъМКъУ-да болгъанды. Хурметли къонакълагъа вузну президенти Барасби Карамурзов, университетни стратегиялы айныу эмда халкъла аралы байламлыкъла жаны бла проректору Хусейн Кушхов, сагъынылгъан окъуу юйню халкъла аралы билим бериу бийик школуну директору Альберт Шапсигов, вузгъа дери хазырлау жаны бла проректор Артур Кажаров, преподавательле бла студентле тюбегендиле.
Къонакъла эм алгъа университетни тийреси бла шагъырейленип, стоматология эмда жаякъ сюек-бет хирургия институтну стимуляция арасында болгъандыла. Дагъыда информатика, электроника эмда робототехника институтну - «Машинала ишлеуде бийик технологияла», «Мехатроника бла робототехника» инновациялы илму-билим бериу, химия бла биология институтну уа прогрессив материалла эмда аддитив технологияла араларын жокълагъандыла. Алай бла КъМКъУ-да илму-тинтиу ишни бардырырча тынгылы амалла болгъанларын, вузну алимлери ол ызда аслам жумуш тамамлагъанларын кеслери кёрюрге онг тапхандыла.
Ызы бла студентле-Иорданияны землячествосуну келечилери бла тюбешгендиле. Аны проректор Хусейн Кушхов ачханды. Делегациягъа бери келгенлери ючюн ыспас этип, университет Шимал Кавказны РФ-ни эм иги окъуу юйлерини он процентини тизмесинде болгъаныны юсюнден хапарларгъанды. Вузну ишини магъаналы ызларындан бири россей билим бериуню экспорту, тыш къыраллы студентлени хазырлау болгъанын ангылатханды.
Бирси жерледен келип окъугъан 1200 адамдан 162-си Иорданияны инсанлары болгъанларын, КъМКъУ-да 50-ден аслам жылны бу къыралдан жашла бла къызла билим алып келгенлерин билдиргенди. Анча заманны ичинде тюрлю-тюрлю сфералада ишлерча мингле бла саналгъан специалистле хазырланнганларын белгилегенди.
Амджан Обу Адалье да алагъа жарыкъ тюбегенлери ючюн ыспас этгенди. Анга Къабарты-Малкъаргъа, сагъынылгъан окъуу юйге къонакъ болуу хычыуун тийгенин билдиргенди. Мында  кёрген затлары аны аладан келген жаш адамла ючюн жарсымазча этгенлерин, Иорданияны университети бла КъМКъУ-ну араларында байламлыкъ болур ючюн келишимге къол салыугъа себепли боллугъун да ангылатханды. Эндиге дери да Россейни бла Иорданияны башчылары бардыргъан политика ол жолну айныта келгенлерин эсгертип, бу тюбешиу да аны андан ары элтиуню бир амалы болуруна ийнаннганын айтханды.
Къабарты-Малкъарда тургъанларыны, бизни республикада билим алгъанларыны юсюнден сезимлерин Иорданиядан келген студентле билдиргендиле. Ала  мында жашагъан халкъланы халаллыкъларыны, огъурлулукъларыны, алагъа болушургъа, бир затны ангылатыргъа угъай демегенлерини юсюнден айтхандыла. Адет-тёрелерибизде келишген жерле болгъанларын, университетни ахшы окъуу юйге санагъанларын, билим алгъанлары бла бирге солургъа заман тапханларын да хапарлагъандыла.
Андан сора да, жаш адамла къонакъгъа визаланы, регистрация жаны бла аланы жарсытхан затланы юслеринден соргъандыла. Абджан Обу Адалье эмда вузну администрациясы ол кемчиликлени биригип тамамларгъа сёз бергендиле. Тюбешиуню ахырында посол, алагъа бу халда тюбегенлери ючюн дагъыда ыразылыгъын билдирип, жетишим, саулукъ да тежеп, КъМКъУ-ну сыйлы къонакъларыны китабында кесини къол ызын къойгъанды.

КъМКъУ-ну пресс-службасы.

Поделиться:

ЧИТАТЬ ТАКЖЕ:

13.11.2026 - 09:03

Жандауурлукъ бирлешдиргенди

Нальчикни 7-чи номерли школунда жандауурлукъ иш къуралгъанды: кюз арты ярмаркадан тюшген ахча энчи аскер операциягъа къатышханлагъа  жиберилгенди. 

13.11.2026 - 09:03

Нарт эпосну энчиликлерине жоралап

Геуюрге кюн Нальчикде «Кавказны халкъларыны эпика чыгъармачылыкълары: тарых бла маданият» деген ат бла халкъла аралы илму конференция ишин башлагъанды.

13.11.2026 - 09:03

Ауушхан нёгерлерини юйюрлерин жокълагъандыла

Ич ишле органлада къуллукъ этгенлени кюнюнде жолда жюрюуню къоркъуусузлугъу ючюн жууаплы болгъан инспекторлары  борчларын толтура туруп  ёлтюрюлген  нёгерлерини юйюрлерин жокълагъандыла.

12.11.2026 - 09:27

«Врачны болушлукъ излеп келгенлеге эм алгъа жюрек жылыуу болургъа тийишлиди»

Бу кюнледе Мечиланы Кязим атлы маданият фондда республикада, андан тышында да белгили врачла бла тюбешиу болгъанды.

12.11.2026 - 09:26

Элбрус курортну тарыхы бла шагъырейленнгендиле

Кёп болмай Москвада Шимал-Кавказ федерал округну Кавказ. РФ институтуну башламчылыгъы бла  «Сакъланнган инфраструктура» деген аты бла кёрмюч болгъанды.  Ол Элбрус курортха  жораланнганды.