«Каббалкэнерго» компанияда электрокюч сетьлеге къараучу эмда алагъа ремонт этиучю специалистлени араларында эришиуле бардырылгъандыла. Бу жол ала Черек районда бёлюмню окъутуу-юйретиу тийресинде ётгендиле, деп билдиргендиле энергетиклени организациясындан.

Усталыкъларында айырмалы болгъан ат ючюн онеки къауум эришгенди. Специалистле компанияны республикада бар бёлюмлеринден келген эдиле. Ала нечик хазыр болгъанларына, ишлерин терк эте билгенлерине, къауумлагъа киргенле бир-бирлерин къалай ангылап къармашханларына энчи комиссия багъа бергенди.

Алай бла биринчи жерге Май районну электрокюч сетьлерини келечилери чыкъгъандыла. Прохладныйде бёлюм экинчи болгъанды, Нальчикден бригада уа ючюнчю жерни алгъанды.

Ызы бла тёрт номинацияда алчыланы белгилегендиле. Эм иги устагъа Прохладныйде бёлюмню мастерин Станислав Кливитенкону санагъандыла, «Айырмалы электромонтёр» атха уа Александр Исаковну тийишли кёргендиле (Майскийде РЭС). Эришиулеге къатышханланы арасында эм сынамлы (тамата) Чегемде РЭС-ни келечиси Шауаланы Рашид (59 жыл) эди. Барындан да жаш а 27 жыллыкъ Аслан Гордогожев болгъанды. Ол Бахсанда бёлюмде урунады. Айырмалы судьялыкъ этгени ючюн компанияны производстволу планла жарашдырыу службасыны башчысы Наталья Супрун махтаугъа тийишли болгъанды.

«Ишчилени усталыкъларын кючлендириу жумушла терк-терк бардырыла турсала игиди. Ала сынам аладыла, участкалада иш къоркъуусузлу эмда къыйматлы болады, хайырланыучуланы электрокюч бла жалчытыу да кючленеди», - дегенди «Каббалкэнергону» баш инженери Алибек Яганов.

Улбашланы Мурат хазырлагъанды.