Тырныауузда Бахсан сууну жагъаларын бегитиу эмда тюбюн теренирек этиу жаны бла ишле былтыр кюз артындан бери дайым бардырыладыла. 2017 жылда 14-15 августда ырхы келтирген ташла бла топуракъ черекни аллын тыйып къойгъан эди. Андан а суу иги да кётюрюлюп, ырхы ызны да бегитгенди.

Бюгюнлюкде тазалау ишле Гирхожан бла Бахсан бирге къошулгъан жерде бардырыладыла. Анда ишлеген техника саны онекиден онсегизге дери жетеди. Суу ыз тазаланнганы бла бирге мындан ары башындан келген балчыкъ Бахсаннга тюшмезча мадарла да этиледиле.

Гирхожан сууда да ырхы ызны тазалау ишле бошалыргъа аз къалгъанды. Объектде жер къазыучу 4 техника эмда юзмезни бла топуракъны ташыучу 10 чакълы бир автомашина ишлейдиле. Бийик тау геофизика институтну бла МЧС-ни специалистлери Элбрус районну бла Тырныаууз шахарны администрацияларында уруннганла бла бирге черекни баш жанын тинтедиле. Вертолётдан да халгъа дайым тёгерекге-башха къаралады, къоркъуу тюшгенлей, аны юсюнден халкъгъа терк билдирип къоярча.