РусГидро компанияны республикада бёлюмю энергетика объектледен бирине кезиулю экскурсия къурагъанды. Бу жолгъу къонакъла Къабарты-Малкъарны къырал аграр университетинден келгендиле. Аны механизация эмда предприятияланы энергия бла жалчытыу факультетини окъуучуларына Басхан ГЭС-ни ичинде экскурсия бардырылгъанды. Станция къалай ишлегенини, анда не затла болгъаныны юсюнден Аслан Хацуков билдиргенди. Ол аны тарыхындан башлап, энчиликлерине, къаллай бёлюмлери болгъанына дери хар нени да жик-жиги бла хапарлагъанды. Къонакъла машинала ишлей тургъан залда болгъандыла, анда юч гидроагрегатха къарагъандыла, турбиналагъа да кёз жетдиргендиле. Экскурсия станция чыгъаргъан электрокючню жыйып, тышына жиберген устройствону къатында бошалгъанды. «Бизге станциягъа къараргъа онг берилгени, студентлеге усталыкъ сайларгъа себеплик этилгени ючюн компанияны бёлюмюне ыразылыгъымы билдирирге сюеме», - дегенди предприятияланы энергия бла жалчытыу кафедрасыны башчысы Амур Фиапшев.

Бизни корр.