Жерлени жарашдырыу жумушланы тамамлагъан кезиуде жыйылгъан информацияны къырал фонддан ким эмда къалай алыргъа боллугъуну юсюнден Роскадастрны Къабарты-Малкъарда бёлюмюнде айтхандыла. Аны башчысыны орунбасары Юлия Лигидова билдиргенича, кадастр ишлени тамамлагъанда, жер участкагъа документлени жарашдыргъанда неда къоншуланы араларында къозгъалгъан дауланы сюзгенде аллай документлеге къараргъа керек болады. Алада чекле биринчи кере къалайда болгъанлары, жер къалайда тургъаны да кёргюзтюледи. Законда айтылгъаныча, бу информация толусунлай къырал фондда сакъланады. Жерлени жарашдырыу жумушланы кезиуюнде жыйылгъан документле ол санда ары да бериледиле. «Бу жумушлагъа кёп зат киреди: участканы тинтиу, планын къурау, хайырланыу, къоруулау. Ишни кезиуюнде ол бары да жик-жиги бла тохташдырылады, жерни чеклери да белгили боладыла», - дегенди Юлия Лигидова.

Бу къырал фонддан документлени ким сюйсе да излерге эркинди, жаланда алада информация ачыкъ болсун ансы. Ол айтханыбыз: бир-бир къагъытланы къуру къырал ишледе хайырланыргъа къоядыла, башхаларында уа инсанны юсюнден энчи информация жазылыргъа боллукъду.

Информацияны алыргъа сюйгенле Роскадастрны бёлюмюне барсынла. Аны адреси: Нальчик ш., Тургенев атлы орам, 21а. Сюйсегиз а къырал жумушланы порталына кирип заявление жиберирге, аны электрон (filial@07.kadastr.ru) неда тёрели почта бла ашырыргъа да боллукъсуз. Заявленияны кеслери жазалмагъанлагъа ведомствону специалистлери болушурукъдула. Аны башха адам ючюн берирге сюйгенле уа доверенность неда тийишли документ кёргюзтюрге борчлудула. Почта бла жиберилген заявленияда документлени къайсы адрес бла ашырыргъа кереклисин да кёргюзтюрге керекди.

Информация жабылгъаннга санала эсе, аны кёрюрге сюйген инсан анга эркинлигине шагъат этген документин неда аны копиясын кёргюзтюрге керекди. Копияда уа нотариусну мухуру болургъа тийишлиди.

Фондда сакъланнган документле бла жаланда Роскадастрны кесинде ишлерге жарайды. Аланы тышына чыгъарыргъа къоярыкъ тюйюлдюле. Копияларын а алып кетерге да боллукъду. 

Улбашланы Мурат хазырлагъанды.