Артисткэ Щэрмэт Людмилэ нобэ къыщалъхуа махуэщ
Илъэс 48-рэ хъуауэ театр гъуазджэм пэжкIэ къулыкъу хуэзыщIэ артисткэ емызэшыжщ Щэрмэт Людмилэ СулътIан и пхъур. А зэманым къриубыдэу абы игъэзэщIащ роли 100-м щIигъу, зым нэхърэ адрейр нэхъ гукъинэжу, цIыхухэр хьэщыкъ ищIауэ. И IэщIагъэм зэрыхуэIэижьым и мызакъуэу, Людмилэ гуп хэтыкIэ зыщIэ цIыху гуапэщ, хьэлэлщ, лъэпкъ Iуэхум гудзакъэ хузиIэ бзылъхугъэ щыпкъэщ. Къыдэлажьэхэми и ныбжьэгъухэми ящIэ ар зэрыгупцIанэр, и Iэр къызыпекIуэкI сыт хуэдэ IуэхукIи зыкъыпщIигъэкъуэну зэрыхьэзырыр, «хьэуэ», «хъунукъым» псалъэхэр абы къызэримыгъэсэбэпыр. ЦIыху къызэрыгуэкI, ауэ зэчий ин зыбгъэдэлъ Щэрмэт Людмилэ и джэгукIэм кIэлъыплъыну Iэмал зиIа псори щыхьэт техъуэфынущ ар сыт хуэдэ ролми зэхуэдэу фIыуэ зэрыпэлъэщым. Образ зэмылIэужьыгъуэхэр гъэщIэгъуэныщэу утыкум щыдегъэлъагъу Людмилэ, псом хуэмыдэу фIы дыдэу къехъулIэу къызолъытэ гушыIэр.
Щэрмэт Людмилэ Аруан районым хыхьэ Къэхъун къуажэм 1953 гъэм къыщалъхуащ. Курыт еджапIэр къиухри, ар 1 щIэтIысхьащ Щукиным и цIэр зэрихьэу Москва дэт Театр училищэм (адыгэ студием, егъэджа-кIуэр профессор Калиновский Леонидт). «Драмэмрэ эстрадэмрэ я театрым и артист» иту диплом зрата цIыхуиблым ящыщ зыщ Людмилэ.
1975 гъэм Налшык къызэригъэзэж лъандэрэ, ар ЩоджэнцIыкIу Алий и цIэр зезыхьэ Къэбэрдей къэрал драмэ театрым щолажьэ. Щэрмэтым 1997 гъэм «Къэрэшей-Шэрджэс Республикэм щIыхь зиIэ и артисткэ», 2008 гъэм «КъБР-м и цIыхубэ артисткэ» цIэ лъапIэхэр къыхуагъэфэщащ.
Хьэл зэмыщхь зиIэ цIыху-хэм я щытыкIэм тыншу зэриувэфым и фIыгъэкIэ, абы утыку кърихьащ лIыхъужь зэмылIэужьыгъуэ куэдым я образхэр. Псалъэм и хьэтыркIэ, Къэбэрдей театрым и тхыдэм къыхэнащ Еврипид и «Ипполит» (Корифейкэм и образыр), ЩоджэнцIыкIу Алий и «Къамботрэ Лацэрэ» (Лацэ), IутIыж Борис и «Тыргъэтауэ» (Адисэ), Думбадзе и «Кукарачэ» (Ревекэ), Шортэн Аскэрбий и «Яшэмрэ къэзышэхэмрэ» (Цоцэ), Иоселиани и «Хъыджэбз къыдэнэжахэр» (хъыджэбзихми я ролхэр гъуэрыгъуэу), Арро и «Мо къэкIуам феплъыт» (Ларисэ), IутIыж Борис и «Хьэпэщып-хэ» (Бабынэ) спектаклхэм, нэгъуэщI куэдми Людмилэ щигъэзэщIа роль купщIафIэхэр. Лирикэ, комедие лIыхъужьхэм я образхэм къадэкIуэу, Людмилэ егъэзащIэ драмэ ролхэри. Абы къегъэлъагъуэ актрисэр езым и жыпхъэм, и джэгукIэ щхьэхуэм и гугъу щыпщI хъуну зэманым зэрынэсар. Щапхъэ нэрылъагъущ Кайтов СулътIан и пьесэм къытращIыкIа «Анэм и гур» спектаклым щигъэзащIэ Марие Павловнэ, Николаи Альдо и «Гулъытэншэ хъуахэр» лэжьыгъэм хэт Пьер, Нало Заур и новеллэм къытращIыкIа «IэфIынэ и нэ фIыцIитIыр» спектаклым анэм и образыр, Горин Григорий и «Кин ЕплIанэм» Госуилл сымэ я ролхэр зэригъэзащIэр. Тырку драматург Несин Азиз и пьесэм къытращIыкIа «СыукI иджы, дунейнэху!» спектаклым хэт Дихэ и ролыр здигъэзащIэм, иджыри зэ Людмилэ джэгукIэ гъэщIэгъуэнкIэ ди пащхьэм къиуващ.
Москва ягъэкIуэнухэр къыщыхах зэIущIэм екIуэлIахэм ящыщ зыт Людмилэ. Курыт еджапIэм адыгэбзэкIэ фIэкIа щемыджа Людмилэ и урысыбзэр «ещIэкъуауэрт», ауэ къылъыса лэжьыгъэр и анэдэлъхубзэмкIэ екIуу щигъэлъагъуэм, Калиновскэм зэуэ гу къылъитащ актрисэ хьэлэмэт къызэрыщIыкIыну пщащэм. ЕджэхукIи и нэIэ зытригъэтар а хъыджэбзым и закъуэкъым, атIэ адыгэ сту- дием щеджа дэтхэнэ зыми ар адэ хуэдэу къащхьэщытащ. Езыми къыдеджа нэгъуэщI артистхэми Москва и театр зэхуэмыдэхэм лэжьа-пIэ къыщыхуагъэлъэгъуат, ауэ гупыр зэрызэрыIыгъыу, Калиновскэмрэ Ефэнды Джылахъстэнрэ (щэнхабзэмкIэ министру щытар) илъэ- ситхукIэ зыхуаущиям тету, я хэку къагъэзэжащ, Адыгэ театрым щылэжьэн папщIэ. А лIитIращ Людмилэ гъуэгугъэлъагъуэ хуэхъуауэ къилъытэр нобэр къыздэсым икIи икъукIэ яхуэарэзыщ.
Гъуазджэм и лэжьакIуэ ухъун щхьэкIэ, дауи, ухуеин къудейр мащIэщ, ар икIи уи лъым хэлъыпхъэщ. Людмилэ IэщIагъэ хуэхъуауэ и гъащIэм къыщыдэгъуэгурыкIуэри и адэ-анэм я деж къыщожьэ.
- Артистыгъэр яхэлът си адэми си анэми, - жеIэ Щэрмэтым. - Къуажэм щагъэува «Къамботрэ Лацэрэ» спектаклым ахэр зэрыхэтам и мызакъуэу, си анэр къызэрыгуэкI гъащIэми щыджэгурейт. Илъэс 90-кIэ псэуати, и нэкIум зы зэлъагъэ иIакъым, си адэмрэ абырэ зэгурыIуэ-зэдэIуэжу, я псэр зы чысэм илъщ жыхуаIэм ещхьу зэрызэдэпсэуар арагъэнщ. Сызэрианэм щхьэкIэ жысIэу щIэджыкIакIуэхэм къащыхъуну сыхуейкъым, ауэ ар цIыху угъурлыт.
Людмилэ гушыIэр зи щIасэ цIыхущ. КъыщыщIа гуэрхэр къыдэлажьэхэм щызэпадзыжкIэ, и жагъуэ ищIын дэнэ къэна, езыри зыщодыхьэшхыж. Ар и щыхьэтщ Щэрмэтым гушыIэшхуэ зэрыхэлъым, езым ар фIыуэ къызэрыгурыIуэм.
Гум щыбгъафIэ хъун защIэу къелъытэ Людмилэ утыкум къыщиджэгуну къыхуихуа образхэр. Ролищэм щIигъу щищIащ Адыгэ театрым и утыкум, иджыпсту ягъэлъагъуэ спектаклхэм ящыщу 4-м хэтщи, абыхэм хигъэфIыкIым сыщыщIэупщIэкIэ, хогупсысыхьри къызжеIэ:
- Псори лъапIэщ си дежкIэ, «кIэщIущ сценэм сызэритынур» жысIэу зезмыгъэлIа- лIэу схуэшэчынукъым, апхуэдэ щIыкIэкIэ Iэпэдэгъэлэл сщIаи яхэткъым. Роль нэхъыщхьэр нэхъ тыншщ пщIыну цIыкIухэм нэхърэ, сыту жыпIэмэ етIуанэр цIыхум гукъинэж ящыпщIыным икъу-кIэ уелIэлIапхъэщ.
Эпизод ролыр фIыуэ къызэрехъулIэр япэу къэзыщIар режиссёр Дэбагъуэ Романт. «ХъуэпсапIэм и трамвай» спектаклым гъунэгъум и ролыр щыхухихащ абы Людмилэ. Iэгуауэ ин зэрыхуаIэ- тар щилъагъум, «Кин ЕплIанэми» хигъэхьэри, Госуиллу джэгуащ.
- Хуабжьу сигу ирохь мы уэркъ бзылъхугъэ гъэфIар, щхьэпсыншэр, а псоми емылъытауэ узыIэпызышэр. Ролым гугъу сыдехьащ, ауэ режиссёрыр апхуэдизкIэ елIэлIат ар щиухуэми, сценэм сыщихьам къыстехьэлъэжакъым. Пэжыр жыпIэмэ, мы ролыр «ришелье» хэдыкIым ещхьщ: апхуэдизкIэ хэплъыхьащ, тIасхъэщ, ауэ щыхъукIэ лъэщу ухуащ, - жеIэ Щэрмэтым. - НэхъыфIу слъагъуу сиIэщ «Гулъытэншэ хъуахэр» спектаклым щызгъэзащIэ ролыр. Ар къызытесщIыкIар Горнэ хьэблэм щыпсэу, быни унагъуи зимыIэ урыс бзылъхугъэт. Ар прототипти, япэ махуэм щыщIэдзауэ сыкъызэрежьам нобэми сытетщ.
Трагедием ущыджэгуну нэхъ тыншщ гушыIэм нэхърэ. Комедием еплъхэр кIуэ пэтми уи гушыIэр къеблу пIыгъыну гугъу дыдэщ. Трагедиер лIо, нэпс къебгъэжэбзэхыныр дакъикъэ Iуэхущ, арщхьэкIэ ари ди IэщIагъэм идэркъым, дэ дыщIагъэджыкIащ зэи утыкум ущыгъ зэрымыхъунум. «Анэм игу» спектаклым зэрыщысхузэфIэкIыр сщIэркъым си нэпсыр сIыгъыну, абы сыщыджэгуху еджапIэм къыщыджаIахэр сигу къызэрыкIыжыр арагъэнщ.
Куэдрэ жызоIэ ар сэ, иджыри къытызогъэзэжри, узэрыт ролыр «къэппсэун» хуейщ. «Репетицэ зэ, тIэу тщIымэ зэфIэкIащ» Iуэху бгъэдыхьэкIэр захуэкъым, апхуэдэкIэ театреплъыр къыпхуэгъэпцIэнукъым. ПщIэр уэ езым къыбгурымыIуауэ, ар дауэ цIыхум деж зэрынэпхьэсыфынур?!
СфIэфI дыдэу садэлэжьащ, зыхуэзгъэдэн щымыIэу цIыху зэчиифIэхэт, режиссёр Iэ-кIуэлъакIуэт Фырэ Русланрэ Теувэжыкъуэ Владимиррэ, иджыпстуи дызэрыгушхуэ Дэбагъуэ Роман сымэ. Сащытхъу пэтми зызгъэнщIынукъым абыхэм, ахэр адыгэ лъэпкъым насыпышхуэу къыдитауэ къызолъытэри.
ГушыIэ щIыкIэм тету Людмилэ и лэжьэгъухэм жаIэ: «Спектаклыр утыку къыщрамыхьэжыну пIалъэр къэса иужьи, Щэрмэтым щIэ гуэр къелъыхъуэ образым хилъхьэну». Пэжщ, утыкум тIэу зэкIэлъхьэужьу зэщхьу къихьэну хуейкъым ар, абы щыгъуэми ипэкIэ ищIар нэгъуэщIым къигъэсэбэпу илъэгъуауэ.
Щеджэ зэманым «Ромео и Джульетта» спектаклым щыджэгуну ехъуапсэу щытащ Людмилэ. Иджы зыхуейр купщIэ зиIэ, узыгъэгупсысэ образщ.
- Айтматов Чингиз и «Пла-ха»-м хэт дыгъужь анэм и ро-лыр схуэщIынут, абы и зэхэщIыкIыр икъукIэ спэгъунэгъущи. Сыту тхакIуэ лъэщт ар, сыту гъэщIэгъуэныщэу цIыхухэмрэ хьэкIэкхъуэкIэхэмрэ зэригъэпщат! - къыпещэ Людмилэ.
Николаи Альдо и «Зерно риса» пьесэм къытращIыкIа спектаклым щыджэгуну хуейт артисткэр. Зи къекIуэкIыкIар гуауэу, гугъуу зэхэлъ цIыхубзым и ролыр игъэзэщIэным иужь зэманхэм зыIэпешэ ар.
- «Уджэгуну зэрынэхъ тыншракъым, атIэ цIыху щхьэхуэм и гум щигъэв гурыгъу-гурыщIэхэр театреплъхэм я деж нэсхьэсыну сызэрыхуейрщ. Дунейр хужь-фIыцIэу зэхэлъ къудейкъым. А гупсысэр хьэкъ пщохъу уи ныбжьыр нэхъ щыкIуатэм, образыр куууэ зэпкърыпхыф щыхъум деж, упщIэ куэдым я жэуап къэбгъуэтыфу уджэгуныр уи псэм къилъыхъуэ хъуа иужь. Къапщтэмэ, сфIэфIщ трагедиемрэ комедиемрэ щызэхэухуэна ролхэр згъэзэщIэн. Ауэ сытми узыгъэдыхьэшх къызэрыгуэкI гушыIэм е мыухыж нэпсым нэхърэ ар гъащIэм нэхъ пэгъунэгъущ», - жеIэ Людмилэ. - Сэ хьэкъыу спхыкIащ ди гъащIэ псор зэрытеатрыр, дэ дызэрыактёрыр. Сценэм хуэдэу сэ гъащIэм сыщыджэгуфынутэкъым, пцIым, бзэгу зехьэным, зэкIэлъымыкIуагъэм срабийщи. Слъагъу хъуркъым цIыху пцIыIуэпцIышэхэр, фэрыщIхэр, пэжым и телъхьэу зызыщIхэр. Театрым щылажьэ псоми ящIэ си Iуэху еплъыкIэр къехьэкI-нехьэкI хэмылъу зэрыжысIэр. Сэ къызэрысфIэщIымкIэ, уи напэр къабзэу, ущIэукIытэн ббгъэдэмылъу, цIыхум и гум узэреуэн псалъэ Iей гуэр къыбжьэдэмыкIыу упсэуным нэхърэ нэхъ насып щыIэкъым.
Насыпыр къыздикIынур пщIэркъым, жаIэ. Адыгэ театрым и лэжьакIуэ пажэхэм зэрырихьэлIар Людмилэ насыпышхуэу къелъытэ. Ахэр зэхуэзышар гъуазджэм хуаIэ лъагъуныгъэрт.
- Иджыпсту театрым и нэхъыжьхэмрэ къищта ныбжьыщIэхэмрэ къурш зэрахуэгъэзынур си фIэщ мэхъу, - къыддогуашэ Людмилэ. - Дэтхэнэ зы театр лъэщми пеуэфынущ ахэр, сыт хуэдэ спектакль гугъури яхуэгъэувынущ. Бзэр яIурылъщ, уадэлэжьэн хуейуэ аркъудейщ. Москва театрхэм я къулеигъэр иIамэ, дыдейр, шэч хэмылъу, зы щхьэкIэ нэхъ лъагэнут. Сыт щыгъуи Къэбэрдей театрым и пщIэр адрейхэм нэхърэ нэхъ лъагэу щытащ, къызэрызэгъэпэщын хуейр лэжьыгъэм я гур хуэзыгъэкъэбзэн IуэхугъуэхэмкIэщ.
Актрисэр сценэм къыщихьэкIэ сыт зэгупсысыр? «ЯпэщIыкIэ согузавэ, театреплъхэм саIуоплъэри, зызэтызоуIэфIэж (си унэжь сыщIэс хуэдэу). Къызэплъхэмрэ сэрэ дяку дэлъ зэпыщIэныгъэм гукъыдэж къысхелъхьэ», - къыхегъэщ Щэрмэтым.
Сыт артистыр зыхуейр? Лэжьыгъэм тезыгъэгушхуэ щытыкIэ театрым иIэрэ утыку къихьэмэ, джэгурэ спектаклым къэкIуахэм Iэгуауэр хуаIэтмэ, дунейм теткъым абы хуумыщIа!
Щэрмэт Людмилэ артист IэщIагъэм къыхуигъэщIахэм ящыщщ. Абы хуэдэхэр щылэжьэху, адыгэ театрым и пщIэри лъагэнущ.
ИСТЭПАН Залинэ.