Сейирлик шарт           

Бизни республикабыз тарых магъаналы  жерлери бла байды. Тау эллерибизде  кёп сейирлик  кешенеле, къалала да  узакъ ёмюрледен къала келип, бюгюнлюкде да сюеледиле. Аллай къалаладан бири Амирхан  къалады.

Кёп къыралладан, жерледен келген  жолоучула, туристле келип, бурун заманладан къалгъан  къурулушлагъа  къараргъа бек ёчдюле. Сёзсюз, ала  Амирхан къалагъа да жол саладыла. Аны тёгерегинде  къарап айланадыла, суратха да тюшедиле.

Амирхан къала кеси да  сейирлик тарых магъанасы болгъан  къурулушду. Тарыхчыла айтханнга кёре, аны онжетинчи-онсегизинчи ёмюрледе Амирханланы  бай юйюрлерини  келечиси   ишлетгенди. Аны аламатлыгъы эмда эс бурурча сейирлиги уа бийиклиги беш метр болгъан аз-маз сыйдамланнган  уллу ташны юсюнде  Огъары Малкъарда  эрттегили  эл – Шкантыны аллында сюеледи. Ол а элге гудучула, аманлыкъчыла  келгенин кёрюп, олсагъат билдирирча этилген  амал эди.

Сёзсюз, къала уллу усталыкълары болгъан адамланы къоллары бла ишленнгенди. Андан къарасанг, Черек  сууну  башха жанында орналгъан Шканты, Кюнлюм  элле да  къол аяздача кёрюнедиле.

Ол Черекге жууукъ болгъанына, анга баргъан жолну таплыгъына да къарамай,  къаланы юсюнден, жарсыугъа, артыкъ кёп  адабият ишле жокъдула. Алай  аны кёрюрге келген туристле, жолоучула да  къурулушуна  эс бурмай къоймайдыла. Узакъ ёмюрледе чынтты  къол устала болгъанларын да чертедиле.

Холаланы Марзият.