Къабарты-Малкъарда «Билим бериу: келир заманнга къарам» деген ат бла форум бир ненча кюнню ичинде бардырылгъанды. Тюбешиуге мектеплени директорлары бла завучлары къатышхандыла. Аны кезиуюнде жыйырмадан аслам кенгеш майдан да ишлегенди.

Аллай майданладан бири уа Нальчикни тёртюнчю номерли гимназиясыны мурдорунда къуралгъанды. Аны директору къонакълагъа мектепни айныууну юсюнден хапарлагъанды.

Алай бла 2018 жылдан бери мында профильли дипломат класс, политика эмда къырал къуллукъчу Евгений Примаков атлы зал да ачылгъандыла. Бу проект Къабарты-Малкъар къырал университет бла биригиулюкде бардырылады. Окъуу юйню преподавательлери тамата класслагъа жюрюгенлеге халкъла аралы праводан, психологиядан, риторикадан, логикадан да дерсле бередиле.

2020 жылда уа гимназияда цифралы археологияны академиялы классы къуралгъанды. Бир жылдан а мында дагъыда «Кванториум» сабий технопарк да ачылгъаны устазланы, окъуучуланы да кёллендиргенди.

Тюбешиуню кезиуюнде дагъыда шёндюгюлю школну айныу юлгюсюню юсюнден айтылгъанды. Эм игиге саналгъан оюмланы юслеринден а, аланы жашауда бардырыр эмда къыйматларын хайырланыр ючюн, ведомстволу министерствогъа да билдирликдиле.

Мокъаланы Зухура.