Нальчикде Миллет музейде КъМР-ни Маданият министерствосу бла къарачай-малкъар халкъны маданият совети «От жагъабыз энди бир заманда да сууумасын!» деген ат бла кёрмюч къурагъандыла. 
Советни директору Биттирланы-Къочхарланы Людмила билдиргеннге кёре, анда миллет кийизлерибиз, суратчыларыбызны да халкъыбызны тарыхына жораланнган чыгъармалары кёргюзтюледиле. 
– Ата-анала сабийлерин бюгюн да, башха кюн да келтирип, эслерин маданият байлыгъыбызгъа бурсала бек иги боллукъду. Нек дегенде ёсюп келген тёлюле халкъыбызны тарыхын кёрюрге, билирге керекдиле, – дегенди ол. 
  Кёрмючде кийиз усталарыбыз Жаппуланы Ёзетханны, Мокъаланы Динаны, суратчыла Боташланы Муратны, Аналаны Муратны, Ахматланы Леуанны, Французланы Казбекни, Аталаны Халисни, Акъкъызланы Керимни ишлери кёргюзтюледиле. Хар автор да, миллет хазнабызны кесича ачыкълай, кёзню къууандыргъан чыгъармала жарашдыргъанды. 

Къасымланы Аминат.