КъМР-ни Башчысы Казбек Коков Къабарты-Малкъар Республиканы транспорт эмда жол мюлк министерствосуну коллегиясыны жыйылыууна къатышханды. Анда ведомствону 2022 жылда ишини эсеплери сюзюлгендиле.

   Жыйылыуда сёлеше, Казбек Коков жол-транспорт бёлюмню айнытыу регионда  экономиканы кючлендириу эмда адамланы жашауларын игилендириу бла байламлы болгъанын чертгенди. «Къоркъуусуз эмда тынгылы жолла» миллет проектни хайырындан кёп жумуш тамамларгъа къолдан келгенди. 2018 жылда жол ишлеге бюджетден 1,8 миллиард сом бёлюннген эсе, 2022 жылда ол 5 миллиард сомдан атлагъанды.

   Министр Аслан Дышеков билдиргеннге кёре, 2019 жылда автомобиль жолланы 800 километри изленнген мардалагъа келиширча этилгенди, 200 километрине чыракълы чыпынла салыннгандыла. Былтыр 180 километрден артыгъын тап халгъа келтирирге къолдан келгенди, 70 километр чакълы бирде кече да жарыкъ болурча этилгенди. Жолланы тапландырыу мардалагъа буруула, белгиле салыу, жаяу ётерча жерлени, тохтамишлени, тротуарланы, машиналаны салырча майданчыкъланы къурау да киредиле.  Казбек Коков битеу ишлени башы – жоллада аварияланы не къадар азайтыуду, деп чертгенди.

    Быйыл да уллу проектледен бир ненчасын жашауда бардырыргъа тюшерикди. Сёз Чегем жолну бир-бир кесеклерини, Каменномостское – Хабаз, Эски Черек – Жемтала – Суукан-Суу, Вольный Ауул-Хасания-Герпегеж жолланы, Нальчикде 9 орамны, Прохладныйде бла Нарткъалада жолланы юслеринден барады.  Башха муниципалитетледе, «Кавказ» Р-217 федерал трассада  да тийишли ишле бардырыллыкъдыла.

    Жыйылыуда дагъыда шёндюгю жол инфраструктураны, жолла айырылгъан жерлени къураргъа кереклисини юсюнден да айтылгъанды. Ол санда сёз Нальчикге Вольный-Ауулдан кирген  Кешоков орам эмда кюн сайын да иги кесек машина тохтагъан парк тийре бла байламлы проектлени юслеринден баргъанды. Транспортну халын, адамланы ташыуну, файдасыз маршрутлагъа себеплик этиуню юсюнден да айтылгъанды. Коллегиягъа киргенле башха  магъаналы сорууланы да кётюргендиле, сёз ючюн, специалистлени окъутуу, бёлюмню предприятияларыны ырысхы-техника онгларын кючлеу, хауа эмда темир жол транспортну ишин игилендириу дегенча.

     Жыйылыуну ахырында Казбек Коков жолчулагъа, ол санда специалистлеге, инженерлеге, жюрек ыразылыгъын билдиргенди. Аланы хайырындан республикада жолла игирек болгъандыла, дегенди, деп билдиргендиле КъМР-ни Башчысыны бла Правительствосуну пресс-службасындан.