Шимал-Кавказ федерал округда уллу, кеслери да бек терк айныргъа боллукъ проектлени тамамлауну юсюнден сёлешиннгенди РФ-ни экономиканы айнытыу министрини орунбасары Сергей Назаров бардыргъан видеоконференцияда. Аны ишине КъМР-ни экономиканы айнытыу министри Рахайланы Борис да къатышханды. Ол бизде бу жаны бла къаллай проектле болгъанын билдиргенди.

Биринчиси – Нальчик шахар округда ИТ-паркны къурау бла байламлыды. Рахай улу айтханнга кёре, анда информация технологияла жаны бла жумушла жалчытхан эмда продукция чыгъаргъан къадар предприятие ишлерикди, алада уруннганланы (450 инсан) айлыкъ хакълары да уллу боллукъду. Паркны Къабарты-Малкъар къырал университетни тийресинде къураргъа оноу этгендиле. Анга анда юч минг квадрат метр жер бёлгендиле.

Экинчи проект къурулуш бла байламлыды. Сёз мында Нальчикде эки жангы микрорайон къурауну юсюнден барады: «Мэй» эмда «Восточный». Аланы къагъыт жумушлары созулгъаны ючюн, ишлени да аз болжалына салыргъа тюшгенди. Инвестицияла уа 2023-2025 жыллагъа кёчюрюлгендиле. Алада юйлени къурулушу быйыл башланырыкъды. Жылны ахырына дери жарым миллиард сом багъасына мадар этилликди.

Чегем районда ишлене тургъан уллу теплица комплекс да аллай проектледен бирине саналады. Аны «Чегем-Агро» предприятие бардырады. Былтыр объектде кёп иш этилгенди: теплицаланы мурдорлары жарашдырылгъанды, жылытыу системалары да орнатылгъандыла. Быйыл тыш инфраструктураны ишлеп бошаргъа дейдиле.

Тёртюнчю проект – «Минги тау» курорт-рекреация комплексди. Озгъан жылны ахырында анда 800 автомашинагъа стоянка ачылгъанды. Азау таланы ара тийресинде тапландырыу ишле да болжалындан алгъа тамам этилгендиле. Энди алайда жангы сатыу-алыу комплекс бла сахна бардыла. Къысхасы, былтыргъа белгиленнген жумушланы барын да толтурургъа къолдан келгенди. Быйыл а эки канат жол ишлерге эмда сегиз лыжа жолну къырал эсепге салыргъа умут этедиле.

Тырныауузда вольфрам бла молибден магъаданла чыгъарыучу комбинатны ишин жангыдан къурауну юсюнден да сагъыннганды министр. Ол бешинчи проектди. Анда да иш барады. Былтыр аны тийресин тазалагъандыла, проект документациясын жарашдыргъандыла, ишчи къагъытларын да хазырлай турадыла. Ары элтирик жолну иги кесеги хазырды. Шёндю уа банкла бла ахча бла жалчытыу жумушланы юсюнден оноулашыу барады.

Улбашланы Мурат хазырлагъанды.