Самолётха минерик адамны къол жюгюню ауурлугъуна эмда уллулугъуна хар авиакомпания да энчи къарайды. Алай дагъыда ала Федерал авиация жорукълада айтылгъаннга таяныргъа борчлудула.

«Аэрофлот» бла Ространснадзор ол документге тюрлениуле кийирирге сюедиле деген хапар чыкъгъанды алгъаракъда. Сёз а анда къол жюкню юсюнден барады. Ала экилери да ол жорукъланы битеу авиакомпаниялагъа бирча этерге сюедиле. Дагъыда аланы пассажирле да женгилирек ангыларча.

Шёндю уа бу жаны бла жорукъла къаллайдыла, къолгъа не зат алып минерге боллукъду самолётха? Аны юсюнден Объясняем.рф сайтда жазгъандыла.

Самолёт къайсы авиакомпанияныкъы да болсун, башхасы жокъду, адам ары къолуна (къошакъ хакъ тёлемей) эм азындан беш килограмм жюк алып кирирге эркинди. Аны уллулугъуну юсюнден жорукълада жукъ да айтылмайды, ол себепден бу соруу компанияны оноуунда къалады. Ауурлугъу неда уллулугъу мардасындан оза эсе, жюкню багажгъа берирге неда аны ючюн тёлерге тюшерикди. Ол кеси да билетни багъасына кирмей эсе, алай.

Белгиленнген ауурлукъну мардасындан артыкъ ма бу затланы алыргъа жарайды къолгъа:

Тиширыула жюрютген сумка неда портфель;
Рюкзак (ауурлугъу эм уллулугъу компанияны излемлерине сыйына эселе);
Гюл къысым;
Юс кийимле;
Сабийге азыкъ;
Костюм (жумушакъ сумканы ичине салып);
Коляска, люлька неда эки жылы толмагъан сабийни къолда тутарча энчи зат. Аланы уллулугъуну мардасын да авиакомпания тохташдырады. Самолётха миннгенден сора, аланы шинтик тюбюне неда олтургъан жерни башында тапкагъа салыргъа керекди. Бир-бир авиакомпанияла уа колясканы жаланда багажгъа берирге къоядыла. Аны барын да самолётха жетгинчи билирге тийишлиди;
Дарманла, учхан кезиуде изленирге боллукъ диета аш-азыкъла;
Къолтукъ эмда къол таякъла, шинтик-коляска;
Аэропортну тийресинде Duty Free тюкенледе сатып алыннган товарла. Ала пластик хуржунда болургъа керекдиле. Аллай затны ауурлугъу, уллулугъу да авиакомпанияны излемлерине келиширге тийишлиди.
Сууланы уа къалай?

100 миллилитр кирген орунлада;
Кеслерин да ичинде не зат болгъаны иги кёрюнюрча, башы да гам жабылгъан аллай пластик хуржуннга салып алай;
Барыда бирге бир литрден кёп болмасын.
Сёз мында ичерге жараулу, косметика, ариу ийисли сууланы юсюнден барады. Дагъыда гель, аэрозоль, спрей дегенча аллай затланы.

Сабий азыкъла бла дарманла уа ол тизмеге кирмейдиле. Аланы къолгъа алырча сылтау болургъа керекди – тамата бла бирге баргъан сабий неда учхан заманда адамгъа аллай суула, препаратла эм ашла керек болгъаныны юсюнден врачдан справка.

Къол жюкню юсюнден хар жерде да бир жорукъла:

Аны хакъсыз мардасын компания тохташдырады: бир адам башына, эм азындан, 10, бек кёбю уа 50 килограмм.
Билетде къолгъа жюк алыргъа жарайды деп жазылмай эсе, аны багъасын тёлерге тюшерикди.
Адамны жюгю, ол кеси миннген самолётда болургъа керекди.
Багажгъа бу затланы берирге керекмейди:

женгил сынаргъа эмда терк бузулургъа боллукъ затла;
ахча;
багъалы темирле эмда аладан этилген затла;
багъалы къагъытла;
документле;
ачхычла;
жютю затла;
чабакъчыкъла;
жаныуарла эмда къанатлыла.
Юй жаныуарла эмда къанатлыла, сора дагъыда ишде хайырланыучу итле ары кирмейдиле. Къурт-къумурсхала, чычханла бла гылыула, жилянла, ауруулу жаныуарла уа киредиле.

Артыкъ уллу неда ауур жюклени багажгъа жаланда жер болса эмда аланы багъалары тёленсе аладыла. Аны къайгъысын самолётха минерден алгъа этерге керекди.

Улбашланы Мурат хазырлагъанды.