Кёп болмай Къабарты-Малкъарда «Иш кёллю Россей» жамауат биригиуню бёлюмюню бизнесни айнытыу жаны бла эксперти Гузеланы Индира  быйыл биринчи тюбешиуню  бардыргъанды. Анга Нальчикден жыйырма беш чакълы предприниматель къатышханды. 
Татлы ашарыкъладан къуралгъан тепсини артында жыйылгъанла былтыр тамамланнган ишлени эсеплегендиле, келир заманнга планларын да ачыкълагъандыла. Бизнес, къолайлыкъ, юйюр, саулукъ сакълау, айнытыу, солуу бла байламлы эм башха  сорууланы да сюзгендиле.  
Гузеланы Индира айтханнга кёре, эсепле жетишимле бла ёхтемленирге онг бередиле эм келир заманнга да таукеллендиредиле. Кемчиликле да сюзюлгендиле, алагъа кёре эсгертиуле  этилгендиле. 
«Иш кёллю Россей» бизнес школну бошагъан  Зарина Варитлова да  бизнес хайырлы болурча не этерге кереклисини юсюнден мастер-класс бардыргъанды. Ызы бла тюбешиу шагъырейлениу халгъа кёчгенди. Аны чеклеринде бёлюмню келечилери  жууукъ танышыргъа, бир бирге телефон номерлерин берирге онг  тапхандыла. 
Эсге сала айтсакъ: алгъаракъда «Иш кёллю Россейни» толтуруучу комитетини регионлада бёлюмлерини таматалары бла селектор кенгешинде былтыр эм жетишимли ишлегенлени эсеплегендиле. Анга кёре, Санкт-Петербург - биринчи, Свердловск область – экинчи эм Москва ючюнчю жерлеге чыкъгъандыла.  Къабарты-Малкъар да, онекинчи жерге тийишли болуп, жыйырма айырмалы регионну тизмесине тюшгенди. 

Магометланы Сулейман.