КъМР-ни Парламентинде Тиширыуланы «Россейни ышаннгылылыгъы» битеуроссей союзуну регион бёлюмюню башламчылыгъы бла депутатла бла тюбешиу болгъанды. Къонакълагъа законла чыгъарыучу органны спикери Татьяна Егорова, аны орунбасары Мурат Карданов, Билим бериу, илму эм жаш тёлюню ишлери жаны бла комитетни башчысы Нина Емузова да тюбегендиле. Кенгешни аллында уа къонакълагъа Парламентни мекямында экскурсия къуралгъанды.
Жыйылыугъа КъМР-ни Башчысыны Парламентде эм сюд органлада келечиси Мадина Дышекова, депутатла Кансаланы Елена, Михаил Кривко, Владимир Безгодько, Заурбек Кумалов да къатышхандыла.
Тюбешиуню ача, Татьяна Егорова ахыр жыллада тиширыула политикада, власть органлада, жамауат ишде да жетишимли болгъанларын белгилегенди. Бу тюбешиу организацияны башламчылыгъы бла къуралгъанын иги шартха санагъанды. «Ол а Парламентни ишине сейир уллу болгъанына шагъатлыкъ этеди. Бюгюн а ачыкъ ушакъ бардырып, законланы игилендириу, граждан обществону бла Парламентни араларында хайырлы байламлыкъланы къурау жаны бла башламчылыкъла этилирле деп ышанама»,-дегенди.
Татьяна Борисовна Шимал Кавказда тиширыу энчи жерни алгъанын, ёмюрлени теренинден да анагъа, эгечге, юй бийчеге хурмет уллу болгъанын чертгенди. «Ахыр жыллада законла чыгъарыучу, аланы толтуруучу власть органлада, бизнесде, жамауат ишде да тиридиле. Ол санда бизни республикада да жамауат-политика, экономика жашаугъа къатышханланы саны ёсгенлей барады, саулукъ сакълауда, билим бериуде, культурада, журналистикада, башха сфералада да жетишимлидиле. Сёзге, Парламентни 6-чы чакъырылыууну депутатларыны 20 процентинден асламы тиширыуладыла. Ол а кёпдю. 3-чю чакъырылыуда ала жаланда 12,8 процент болгъандыла. Шахарлада бла элледе представительный власть органлада уа аланы саны андан да уллуду – 23 проценти. Бу тарихлеге кёре дунияда болгъан орталыкъ эсепге жууукъбуз»,-дегенди спикер.
Сёзлерине юлгюле да келтиргенди Татьяна Борисовна: республикада Парламентге, Финансла министерствогъа, Контроль-эсеплеучю палатагъа, профсоюз биригиуге, Борчлу халда медицина страхованияны жер-жерли фондуна таматалыкъны тиширыула этедиле.
Сёз депутатла бардыргъан жандауурлукъ ишни юсюнден да баргъанды. Парламент Уллу Ата журт урушну ветеранларына, къыйын жашау болумгъа тюшген сабийлеге себеплик этгенлерин, алагъа керекли затланы алгъанларын, харкюнлюк жумушларында болушханларын белгилегенди спикер.
Тиширыуланы бирикдирген жамауат организацияланы саны ёсгенин да билдиргенди спикер: бюгюнлюкде ала сегизге жетгендиле. «Болсада быллай тирилик тиширыуланы кеслеринден келирге керекди, аланы ыразылыкълары бла. Ансыз жамауатда тенглик боллукъ тюйюлдю»,-дегенди эмда залда жыйылгъанлагъа заманларын, къарыуларын аямай жамауатха магъаналы жумушланы толтургъанлары ючюн ыразылыгъын айтханды.
Нина Емузова уа Парламентни законла чыгъарыучу, контроль, представитель борчларыны юслеринден айтханды. Ол Парламент жамауат бла тюбешиулеге ачыкъ болгъанын, депутатла жаш адамла бла терк-терк тюбешгенлерин да белгилегенди. «Алай сизнича тири тиширыула уа бизге къонакъгъа биринчи кере келедиле»,-дегенди.
Мурат Карданов да сёлешгенди. Ол тиширыула спортда да жетишимли болгъанларын, рекордла салып, халкъны сейир этдиргенлерин чертгенди. «Сиз жетишимлеге, ишинги андан да бийик даражада бардырыргъа кёллендиресиз»,-дегенди эмда аналагъа энчи ыразылыкъ сёзле айтханды.
Къонакъла Парламентни ишини юсюнден тынгылы хапар алыр ючюн а презентация къуралгъан эди. Анда законла чыгъарыучу органны борчларыны юслеринден шартла белгили этилгендиле.
Тиширыуланы «Россейни ышаннгылылыгъы» битеуроссей союзу къаллай жумушла толтургъаныны юсюнден организацияны регион бёлюмюню башчысы Алёна Чернова билдиргенди. Ол айтханыча, организацияны башламчысы Къырал Думаны депутаты Алевтина Апарина болгъанды, аны регион бёлюмю 2008 жылда къуралгъанды. Аны районлада бёлюмлери бардыла, битеу да бирге союз 239 адамны бирикдиреди.
Организация миллетлени араларында келишиулюкню жалчытыу, республиканы, къыралны да миллетлерини культураларын, тарых хазнасын сакълау, жаш тёлюню патриот ниетледе юйретиу жаны бла магъаналы жумушла толтурады. Жандауурлукъ фонду да барды. Аны чеклеринде кёп сабийли, къыйын жашау болумгъа тюшген юйюрлеге, башха къауумлагъа болушлукъ этиледи.
Кенгешде депутатла да сёлешгендиле. Кансаланы Елена Парламентни къуралыууну эмда борчларыны юслеринден айтханды.
Михаил Кривко, таматалыкъ этген Жамауат къоркъуусузлукъ эм коррупциягъа къажау комитетни ишини юсюнден айта, республикалы праволу базаны игилендириу бла бирге федерал законланы жарашдырыу ишге энчи эс бурулгъанын айтханды. Ол билдиргенича, комитет 8 законодательный башламчылыкъны хазырлагъанды, ала сюзюлюп, федерал законлагъа бурулгъандыла. «Бюгюнлюкде да эки законодательный башламчылыгъыбыз федерал парламентни къараууна берилгендиле»,-дегенди ол.
Сёзге къошула, Татьяна Егорова депутатла ёксюз сабийлени къауумундан инсан энчи аскерчи операцияда ёлтюрюлсе, анга къыралдан берилген жашау журтну юйюрюне къоюуну юсюнден законну проектин Къырал Думаны къараууна бергенлерин билдиргенди.
Дагъыда Уллу Ата журт урушну жылларында туугъанлагъа «Урушну сабийлери» статус бериуню юсюнден да айтханды. Ол билдиргенича, законну проекти жарашдырылгъанды, ол бюгюнлюкде Правительствону къараууна берилгенди. Алай тюрлю-тюрлю сылтаула бла алыкъа жашауда бардырылмайды. «Ол къыйын жыллада туугъанлагъа энчи статус бериу артыкъда магъаналыды. Закон къабыл кёрюлюр деп бек ышанабыз»,-дегенди ол.
Жыйылыуда башхала да сёлешгендиле.
Тикаланы Фатима.
