Мы махуэхэм дунейм адыгэу тетыр зыщыгуфIыкIа хъыбар гуапэ къэIуащ. Израилым щыIэ Кфар-Камэ адыгэ къуажэр хэхуащ ООН-м «турист жылэу» къилъыта гупым. Къэрал 57-м щыщу турист щIыпIэ телъыджэу къалъытэну хуейуэ къагъэхьа лъэIуи 130-м пхыкIащ ди лъэпкъэгъухэр зыдэс къуажэр. Иджы абы мылъкушхуэ хуаутIыпщынущ, туризм ехьэжьа щагъэпсын папщIэ.
«Мы текIуэныгъэм Израилыр дуней псом щыцIэрыIуэ турист щIыпIэ ехьэжьахэм ябгъуригъэувэнущ», - жиIащ Израилым туризмэмкIэ и министр Разбо-зов Йоэль. ИкIи Израилыр япэу хэхуэу аращ ООН-м мыхьэнэшхуэ зиIэу къилъытэ турист щIыпIэхэм.
Мы зэпеуэм и мыхьэнэ нэхъыщхьэр цIыху мин 15-м нэс зыдэс жылэхэр, турист кIуапIэхэр, нэхъри егъэфIэкIуэнырщ. Кфар-Камэ илъэси 150-рэ и пэ адыгэхэм яухуа жылэщ, тхыдэ гъэщIэгъуэн иIэу, адыгэ хабзэ, щэнхабзэ щызэрахьэу, адыгэбзэкIэ щыпсалъэу, адыгэ музей дэту. Абы сытым дежи дихьэхырт туристхэр, а псори къалъытагъэнщ, мылъкукIэ зыщIагъакъуэу нэхъри зрагъэужьыну щIыпIэу къыщыхахым.
Езы адыгэ къуажэр Тель-Авив и ищхъэрэ-къухьэпIэ лъэныкъуэмкIэ -километри 120-кIэ, Тберие гуэлым километр 20 - 25-кIэ пэIэщIэу щысщ. Кфар-Камэ цIыху 4000-м нэблагъэ дэсщ, ар унагъуэ 1130-рэ мэхъу. Абыхэм я процент 90-р шапсыгъщ, абазэхэхэр, хьэтыкъуейхэр, бжьэдыгъухэр унагъуэ зыбжанэ мэхъу.
Жылэр жэнэт лъахэ цIыкIу хуэдэщ, хэкум зэрыпэIэщIэр думыгъуэмэ. Куэбжи бжыхьи щумылъагъу щIыпIэщ ар, и жьэгу пащхьэр зэщIэгъэнарэ берычэтыр дэзу, хьэрыпыбзи журтыбзи щыземыкIуэу, адыгэбзэ фIэкIа щызэхыумыхыу. Къуажэкум къатищу зэтету администрацэм и унэр итщ, библиотекэ хэтщ. Къуажэм ущыдыхьэкIэ гъуэгугъэлъагъуэхэм тет псалъэхэр журтыбзэкIи адыгэбзэкIи тетхащ, IуэхущIапIэу дэтми, уэрамхэми я цIэр адыгэбзэщ зэрытетыр икIи адыгэцIэщ зэрахьэр - Къэбэрдей, Шапсыгъ, Iуащхьэмахуэ, Хъан гъуэгу, Налшык, Псы, Мазэ…
Дэсхэр гъунэгъу къалэхэм щыIэ фабрикэхэм, заводхэм щолажьэ, дзэм, полицэм къулыкъу щащIэ, абы къыдэкIуэуи тыкуэн, шхапIэ, щхьэц щIэщапIэ хуэдэхэр къызэIуахауэ ягъэлажьэ, щIыгум толэжьыхь, былым ягъэхъу, жыг хадэ хасэ. Къыхэгъэщыпхъэщ унагъуэ Iуэху гуэр зэфIагъэкIын е цIыхур зыхуей хъу Iуэхутхьэбзэр игъуэтын папщIэ ахэр нэгъуэщI къалэ кIуэн зэрыхуэмейр. Кфар-Камэ псори щыбогъуэт, курыт еджапIэ, сабий гъэсапIэ, сымаджэщ, банк, пощт - псори дэтщ, тыншу ущопсэу.
УмыгъэщIэгъуэн плъэкIыркъым журт къэралым ис адыгэ къуажэ цIыкIум дэсхэм я анэдэлъхубзэм пщIэ зэрыхуащIыр. Ахэр къызыхэкIа лъэпкъым, я адэжьхэм, адыгэ мамлюкхэм яхэлъа лIыгъэмрэ яIа щIыхьымрэ, я хабзэ дахэмрэ нэмысымрэ ирипагэу мэпсэу нобэр къыздэсым икIи къыдэкIуэтей щIэблэр абы зэрыщIапIыкIыр нэрылъагъущ. Къуажэм адыгэбзэ фIэкIа зэрыщыземыкIуэр щыхьэт тохъуэ я лъэпкъ зэхэщIыкIым зэрызиужьам.
Кфар-Камэ и псэукIэр зэрызэIузэпэщым къегъэлъагъуэ къэралыгъуэр зей журтхэмрэ ди лъэпкъэгъухэмрэ зэгурыIуэрэ лъытэныгъэрэ я зэхуаку дэлъу зэрызэдэпсэур. Журтхэми пщIэ къыхуащI адыгэхэм, зэгурыIуэу, зэдэIуэжу, я жылэр зыхуей хуэзэу, къабзэу зэрахьэу зэрыщы-тым гу лъатэ, абы нэхъри зиужьын папщIэ мылъкукIэ зыкъыщIакъуэ зэпытщ.
Къуажэм мыадыгэ щыпсэукъым. ЩIалэгъуалэр инженеру, архитектору, дохутыру, экономисту, адвокату йоджэ, къэралым пщIэ къыщыхуащIу щолажьэ. Хьэрып, журт къалэхэм IуэхущIапIэхэм я унафэщIу ди лъэпкъэгъу куэд щыIэщ, уеблэмэ бзылъхугъэ къудейуэ банкхэм я унафэщIу щы яIэщ. Нэхъыбэр щылажьэр Хайфэрэ Тбериерэщ, ахэр нэхъ я гъунэгъущи. Жылэдэсхэм пашэу, пэрыту къахэщыр куэд мэхъу.
«Ди гъунэгъуу къыщыс журтхэм, хьэрыпхэм еджэныгъэкIэ, IуэхукIэ, лэжьапIэкIэ дапыщIащ. Зэи хьэлэбэлыкъ ди зэхуаку къыдэхъуауэ сщIэжыркъым. Къэралыр къапщтэмэ, «сыадыгэну сыхуейщ» жыпIэмэ, зыри къыщыппаубыдыркъым. Уеблэмэ, зыгуэр ухуэныкъуэмэ, къыбдэIэпыкъунущ», - жеIэ къуажэм и тхьэмадэ Нэпсо Закарие.
Кфар-Камэ дэсхэм я тхыдэм-рэ лъэпкъ хъугъуэфIыгъуэмрэ щахъумэу яIэ Адыгэ музейрщ туристхэм я зыплъыхьыпIэ нэхъыщхьэр. Ар 2006 гъэм къызэIуахауэ щытащ. Музейр тIууэ зэтет унэшхуэщ, ар 1900 гъэм ящIауэ щытащ. ГъэщIэгъуэнщ музей ящIыжа унэшхуэм и хъыбарыр. Ар Щхьэлахъуэхэ ейуэ щытащ. Къуажэдэсхэм къызэрыджаIэжымкIэ, зэкъуэшхэу Iэсхьэдрэ Саидрэ хуабжьу къулейуэ, щIэныгъэ яIэу щытащ. Тырку къэралыгъуэм къикIыу Кфар-Камэ къэкIуауэ зы министри, генерали, сатуущIи кIуэжыртэкъым, Щхьэлахъуэхэ емыблэгъауэ. Зэшхэм щхьэлитху ягъэлажьэрт, щIыгу гектари 100-м щIигъу яIыгът, унэIут щэныкъуэ яIэт.
Иджы музейуэ ягъэпсыжа а унэм и тхьэмадэу щыта Щхьэлахъуэ Iэсхьэд къытехъукIыжахэр Иорданием щопсэу, абы и къуэш Саид къытекIахэми Иорданиемрэ Америкэмрэ псэупIэ яхуэхъуащ. Кфар-Камэ жылэ Хасэм унэмкIэ хуитыныгъэхэр къыдихри, музейуэ ягъэпсыжауэ, къуажэдэсхэми къакIуэ туристхэми адыгэм и хъыбар щыхуаIуатэу мэлажьэ. Абы щIэлъ дэтхэнэ хьэпшыпми щIэупщIэ иIэщ, я тхыдэр цIыкIуи ини яфIэгъэщIэгъуэнщ. Музейм щIэлъ экспонатхэр ди адэжьхэм я щIэин дыдэщ, лIэщIыгъуэ гъуэгуанэ къызэпачауэ ди нобэрей гъащIэм къахьэсащ. Туристхэм яфIэгъэщIэгъуэнщ адыгэ фащэр, Iэщэр, макъамэ Iэмэпсымэхэр, нэгъуэщIхэри.
ЗыплъыхьакIуэхэм я процент блыщIыр Израилым ис журтхэращ. Абыхэм я нэхъыбэр адыгэм и хъыбар зэзыгъэщIэну хуейхэрщ. Процент 14 хуэдизыр хьэрыпщ. Ахэри я гуапэу къакIэлъокIуэ, адыгэмрэ муслъымэнымрэ ягу дохьэри, нэхъ гъунэгъуу зрагъэцIыхуну, я къекIуэкIыкIам зыщагъэгъуэзэну хуейуэ апхуэдэщ. Адрей къэнар, къэралым къихьэ туристхэращ - итальян, урыс, нэгъуэщI лъэпкъхэрщ.
Израилым ЭкономикэмкIэ и министерствэм и лэжьакIуэ, Кфар-Камэ щыIэ Адыгэ Хасэм жыджэру хэт Нэпсо Айбэч лэжьыгъэ зэманым къыщыдэхуэкIэ, Адыгэ музейми щолажьэ. Бзэ зэмылIэужьыгъуэ куэд зэрищIэм къыхэкIкIэ, Кфар-Камэ къыдыхьэ туристхэми адыгэм и блэкIамрэ нобэ и щыIэкIэмрэ ирегъэцIыху, музейм щIэлъ хьэпшыпхэм я мыхьэнэмрэ къызэрагъэсэбэпу щытамрэ яжреIэ, адыгэ щэнхабзэмрэ гъуазджэмрэ я къулеягъыр яхуеIуатэ.
«Узыхуей IэщIагъэр зэбгъэгъуэта нэужь, лэжьапIэ тыншу къыбогъуэт. ЩIэныгъэ нэхъыщхьэ уиIэмэ, уIэщIагъэлI хъарзынэмэ, укъагъэщIэхъунукъым. Уеблэмэ, узэрыадыгэр къащIамэ, нэхъ гулъытэ, дэчых къыпхуащIынущ. Сэ нэгъуэщI лъэпкъ щыщхэм жаIэу куэдрэ зэхэсхащ адыгэр зэрыцIыху пэжыр, и лэжьыгъэр гугъэзагъэу зэрызэфIигъэкIыр, дзыхь хуэпщIар езым и щхьэ Iуэхум хуэдэу зэрызэфIихыр. «Iуэху гуэр адыгэм и пщэ дэплъхьамэ, угъуэлъыжу ужей хъунущ», - жаIэ журтхэм», - къыджиIащ Айбэч.
Жылэм и къабзагъми, музейм и беягъми, дэсхэм я тхыдэми димыхьэхынкIэ Iэмал иIэкъым туристхэр. Езы къуажэр музей хуэдэщ, журтхэм яхэс ди лъэпкъэгъухэм я хъугъуэфIыгъуэхэр щахъумэу. Зи гугъу тщIы Iуэху псоми дяпэкIэ дунейпсо мыхьэнэ иIэнущ. ООН-м и мылъкукIэ адыгэ къуажэр нэхъри ирагъэфIэкIуэнурэ турист кIуапIэ ехьэжьа хъунущ.
Тхыгъэри сурэтхэри зейр НэщIэпыджэ Замирэщ.