Быйыл биринчи январьдан башлап, организацияла бла предпринимательле кеслерини налогларын эмда башха тёлеулерин Бир налог счётха (ЕНС) кёчюрлюкдюле. Ахчаны жаланда ары салыу бла чекленип къалыргъа боллукъду. Налог органла уа аны налоглагъа эмда башха тёлеулеге кеслери юлеширикдиле, дегендиле ФНС-ни Къабарты-Малкъарда бёлюмюнде.

Бу счёт алгъыннгы къадар тюрлю тёлеу реквизитлени орунуна жарашдырылгъанды. Энди жаланда налог тёлеучюню ИНН-ин билирге эмда ахчаны счётха салыргъа керекди – аладан сора этер зат жокъду. Халатла боллукъ тюйюлдюле, тёлеуле уа жерине заманында жетерикдиле. Ол а бизнесге да игиди, заманларын, ахчаларын да аяйды.

Налог тёлеуню болжалы, тийишли налог кезиу бошалгъан айны 28 кюню бла чекленеди, отчётну бериу а – 25 бла. Алгъынча, хар налогну кесини кюнлерин эсде тутаргъа керекмейди.

ЕНС-ни энтта да бир игилиги барды: налог тёлеучюде борчу эмда артыкъ бергени боллукъ тюйюлдю энди. Бу счётха ахча салынса, биринчиден, инсанны борчу жабылады, ызы бла заманларына тийишлиликде налогла тёленедиле, ахырында уа – пеняла бла тазирле.

Счётда артыкъ ахча жыйылса, инсан аны артха къайтарыргъа неда башха адамгъа кёчюрюрге эркинди. Бу жумушха заман бла чек салынмайды. Счётха арест салынса уа, аны бир кюнню ичинде тешерге боллукъду. Пеня да хар налогга энчи угъай, битеу берликге бирча тергелликди.

Бир налог счёт не халда болгъаныны эмда аны юсюнден толу информацияны «Личный кабинет индивидуального предпринимателя» (https://lkip2.nalog.ru/lk) эмда «Личный кабинет юридического лица» (http://lkul.nalog.ru/) сервиследе табаргъа боллукъду. Налог службаны сайтында (www.nalog.gov.ru) «Бир налог счёт» бёлюм ачылгъанды. Анда да «Соруу-жууап» халда информация басмаланыпды.

Быллай счётну юсюнден сорлугъугъуз бар эсе, ФНС-ни контакт-арасына 8-800-222-22-22 номер бла сёлешигиз. Ведомствону Къабарты-Малкъарда бёлюмюню телефонларын а www.nalog.gov.ru сайтда «Контакты» бёлюмюнде табарыкъсыз.

Улбашланы Мурат хазырлагъанды.