Кюн бузулгъаны ючюн электрокюч мюлкде иш къыйын болгъанды. Арт кезиуледе кёп жерледе ызла юзюлюп, чыпынла да аууп, къадар адам токсуз къалгъанды. «Каббалкэнергону» специалистлери къолдан келгенича къармашып, мадар этедиле. Алагъа бирси регионладан электрикле да келип болушадыла.

 Алай бла бюгюнлюкде аварияла болгъан жерледе 28 бригада (173 адам) ишлейди. Алада хайырланыуда 62 машина барды. Специалистле 170 чыпынны жангыдан сюегендиле, юзюлюп тюшген 1450 ток ызланы артха къошхандыла, 880 изоляторну жангыртхандыла. Ремонт ишлени тынгылы бардырырча 10 кВ кючлю ызны сетьден айырлыкъдыла, 0,38 кВ ызда да мадар этерикдиле. Кёп эллеге жангыдан ток барып башлагъанды, алай бу кече авария болгъаныны хатасындан ол Экинчи Чегемде ёчюлгенди. Энергетикле терк окъуна мадар этип, аны жангыдан жиберип башлагъандыла. Алай бла иш барады, бригадала битеу керек затла бла жалчытыныпдыла, деп ышандыргъандыла компанияда.

Улбашланы Мурат хазырлагъанды.