«Россети Шимал Кавказ» компанияны Къабарты-Малкъарда бёлюмюнде от тюшюу жаны бла къоркъуусузлукъну юсюнден конкурсда хорлагъанланы белгилегендиле. «Каббалкэнергода» айтханларыча, электрокюч установкаланы, мекямланы эмда объектлени хайырланыуда быллай къоркъуусузлукъну жалчытыу эм уллу магъананы тутады. Аллай жерледе от тюшсе, сетевой мюлкге ол уллу заран салады, ток бла жалчытыу да бузулады. Бу конкурсну магъанасы уа профилактика ишни кючлендириу эмда энергетиклени аллай жорукълагъа бютюнда тынгылы юйретиу бла байламлы эди.

Эришиулеге къатышханланы билимлерине эксперт комиссия отуз кёрюмдюге кёре багъа бергенди. Ол санда терк къабыныргъа боллукъ материалланы не халда тутханларына, подстанциялада жумушлагъа къалай къарагъанларына, отну ёчюлтюучю аберилени хайырлана билгенлерине кёре да. Къоркъуусузлукъну жорукъларына уа бютюнда уллу эс бурулгъанды.

Алай бла конкурсну эсеплерине кёре, Терк районда подстанциялада уруннган коллектив биринчи жерге тийишли болгъанды. Экинчини Май районда электросеть алгъанды, ючюнчюню уа Прохладна районда бёлюмге бергендиле.

От тюшюу жаны бла къоркъуусузлукъну жорукъларына юйретиуге «Каббалкэнергода» не заманда да уллу магъана бериледи, дейдиле компанияда. Электрокюч объектлени къоруулауда автоматизациялы системала хайырланыладыла. Подстанциялада жангыртыу ишле бардырылсала уа, алагъа да кёз жетдирмей къоймайдыла.

Улбашланы Мурат.