Нальчикни аэродромунда къутхарыучула юйрениуле бардыргъандыла. Анда авиатранспорт бла байламлы къыйын болумну кезиуюнде битеу тийишли службала къалай ишлегенлерин сынагъандыла.

Алай бла жумуш ЯК-40 самолётну авария халда къонууу бла байламлы болгъанды. РФ-ни МЧС-ини КъМР-де Баш управлениясыны пресс-службасындан билдиргенлерине кёре, от ёчюлтюучю-къутхарыу бёлюмле болумну юсюнде борчларын тынгылы толтургъандыла.

Юйрениулени кезиуюнде, къоркъуусузлукъну жалчытыу мурат бла, ол тийреге полициячыла адамланы жибермегендиле. Ызы бла от ёчюлтюучюле отну ёчюлтгендиле эм энчи техниканы хайырлана, самолётну аварияны кезиуюнде хайырланылгъан эшиклерин  бузуп, андан адамланы чыгъаргъандыла. Аэродромну медицина службасыны келечилери уа алагъа терк болушлукъ тапдыргъандыла.

Бу ишге контроль этген таматала белгилегеннге кёре, битеу службала борчларын кереклисича, бийик даражада толтуруп, хазырлыкъларын ачыкълагъандыла.

Саулай да юйрениулеге 65 адам бла 14 техника къатышханды.

Къасымланы Аминат.