Алгъаракълада  Быллымда  чаришле ётгендиле. Аланы элни администрациясы  эмда районну ветеринар службасы къурагъандыла. Эришиуге, быллымчыладан сора да,   Бахсан, Чегем, Черек районланы эмда  Акъ-Суу элни  келечилери да къатышхандыла. Алай бла байрам  эсде къалырча  болгъанды.

Юч чаришден экиси Быллым элни тарыхында  атларын айтдыргъан адамларына жораланнган эди. Толгъурланы  Магометни хурметине  къуралгъан эришиуде Черек райондан Черкесланы Ислам хорлагъанды. Экинчи, ючюнчю жерле

Бахсан райондан  Ислам Жемуховха, Акъ-Суудан  Атабийланы Ибрагимге жетгендиле. Толгъурланы Абдул-Керимни  хурметине чабышыуда уа биринчи болуп белгиленнген жолну  Чегем райондан Къалабекланы Алим ёталгъанды. Экинчи эмда ючюнчю жерлеге Элбрус райондан Толгъурланы Мухтар бла Бахсан райондан Рустам Гучев тийишли болгъандыла.

Ючюнчю чаришде хорлагъаннга Быллым элни администрациясыны саугъасы жетерик эди да, аны Къалабекланы Алим  алгъанды, экинчи болуп финишге Жемухов Ислам келгенди, ючюнчю жерде уа  Атабийланы Ибрагим  тохтагъанды.

Хорлагъанланы барысына да саугъагъа иерле, башха  ат керекле, кубокла, администрацияны грамоталарын да бергендиле. Эришиуле баргъан кезиуде быллымчы тиширыула локъумла биширип, чаришчилени, алайгъа келген эллилени уллусун, гитчесин да  сыйлагъандыла.  

Бу жолгъу чариш биринчи эди, болсада аны къурагъанла келир жыл да биягъы быллай байрам бардырыргъа, анга къатышыргъа бютюн аслам чаришчини чакъырыргъа, алай бла  эришиулени тёрели этерге  келишгендиле.

Холаланы Марзият.