РФ-ни Цифралы айнытыу, связь эмда аслам коммуникацияла жаны бла министерствосу кесини  телеграм-каналында  «Цифралы кемчиликлени кетериу» деген къыйматлы  проект жашауда  къалай тюрлю бардырылгъанын ангылатханды.  

Анга кёре, 2030 жылгъа 100-500 адам жашагъан эллени барында да тынгылы мобиль связь эм LTE стандартха кёре терк интернет ишлерча боллукъду.

Тийишли инфраструктураны эм биринчи къайда тартыргъа керек болгъанын жамауат кеси сайларгъа боллукъду. Аны ючюн «Госуслуги» порталда къол кётюрюуге  неда Россейни профильли министерствосуну  бу адрес бла почтасына  жазып билдирирге керекди:  123112,  Москва шахар, Пресненская набережная, 10-чу номерли юй.

Письмода мобиль интернет керек элни бла  авторну  аты  эм адреси белгили болургъа тийишлиди. Элден жамауатны атындан жаланда бир письмо жибериледи.  Аны 26 ноябрьден кеч къалмай ашырыргъа борчлуду. 

Былтыр 85 минг адам къол кётюргендиле. Быйыл да эсепле чыгъарылгъанларындан сора, 1800 эл сайланырыкъды эм ала экинчи жылны ахырына Интернет бла сылтаусуз жалчытылынырыкъдыла. 

- Бюгюнлюкде  окъуна  цифралы сервислесиз жашау этерге къыйынды. Болсада хар башха жумушдача мында да тийишли инфраструктура къуралыргъа керекди. Ол себепден    сагъынылгъан проектни  чеклеринде гитче элчикледе окъуна Интернетни тартыргъа онг табыллыкъды,- дейди КъМР-ни Цифралы айнытыу министрини орунбасары Аскер Бозиев.

Эсге сала айтсакъ, бюгюнлюкде республикада 408 адам къол кётюргенди. Быйыл сагъынылгъан проектни хайыры бла  юч элни  Интернет бла жалчытыргъа онг табылгъанды.

Бизни корр.