«Долина Нарзанов» санаторий ишлеп башлагъанлы бу кюнледе элли жыл толгъанды. КъМР-ни Правительствосуну Председателини орунбасары Марат Хубиев анда уруннганланы КъМР-ни Башчысы Казбек Коковну атындан алгъышлагъанды. Санаторийни коллективи жарым ёмюрню ичинде халкъны саулукъландырыу жаны бла бек уллу иш тындыргъанын чертгенди ол. «Курорт бёлюм тюрлениуле сынагъан кезиуледе санаторий сакъланып, бюгюнлюкде бек тап ишлейди. Бизни республикагъа курортла бек магъаналыдыла, сиз а, хурметли шуёхла, ишигизни эм бийик даражада бардырасыз», - деп айтханды вице-премьер.

Къууанчлы жумушха КъМР-ни Парламентини депутатлары, министерстволаны келечилери, санаторийде солугъанла да къатышхандыла. Анда уруннганлагъа ыразылыкъларын кёпле билдиргендиле, аланы усталыкъларын, къонакъланы бет жарыкълы тюбегенлерин белгилегендиле.

Учрежденияны тийресинде скверде бу юбилейге атап эсгертме къанга орнатхандыла, айырмалы ишчилени уа саугъала бла къууандыргъандыла.  Ызы бла Музыка театрны солистлери къонакълагъа эмда коллективге концерт кёргюзтгендиле, Черек эмда Прохладна районла уа миллет арбазларын къурагъандыла. Алада уа бурун заманладан сакъланнган къыйматланы эмда къол устала жарашдыргъан затланы кёрюрге боллукъ эди.

Улбашланы Мурат хазырлагъанды.