Нальчик шахарда «Юность России» деген спорткомплексде  Къабарты-Малкъарны от ёчюлтюучю -къутхарыу гарнизонуну жыйымдыкъ командаларыны арасында эришиуле ётгендиле. Бу жумуш от ёчюлтюу-къутхарыу спортну 85-жыллыгъына аталгъанды. 

Чемпионатха  гарнизондан 25 къауум къатышанды. Аны къууанчлы халда ачылыууна «От ёчюлтюу-къутхарыу спортну федерациясы» жамауат организацияны Къабарты-Малкъардагъы регион бёлюмюню башчысы Беслан Хатухов да къатышханды. Ол жашлагъа алгъыш сёзле айтып, жетишимле тежегенди.

-Быллай эришиуле спортну  бу тюрлюсюню Къабарты-Малкъарда айныууна,  спортчуланы усталыкъларын ёсдюрюрге, бийик жетишимлени болдурургъа себеплик этедиле, -деп белгилегенди Беслан Хатухов.  

  От ёчюлтюучюню эм авария-къутхарыу ишлени къурау жаны бла управленияны  орунбасары Къазакъланы Азнор да эришиулеге къатышханлагъа хорламгъа итиниулюк, ариу сермешле тежегенди.

Тёрт кюнню ичинде спортчула  къарыуларын басхыч бла тёртюнчю этажгъа минип, чырмау бла жюз метрге чабыу эмда от тюшюу бла байламлы эришиуледе   сынагъандыла.

Баллиланы Алина.